Mahuma: Diasabra den careda di 11’or y mey di mainta, a pasa un accidente basta serio riba Green Corridor riba e rijbaan di Oranjestad pa San Nicolas, esaki a sosode na altura di e garashi di Fofoti Tours, mirando den ki condicion e autonan a keda, a pidi mesora pa presencia di polis y ambulance.
Na yegada nan a bin compronde cu un Ford Mustang color oranje tabata biniendo di pabou y pa un of otro motibo a perde control, a bay dal na e parti patras di un Nissan Versa cora cu tabata un auto di huur y cu tambe tabata bayendo direccion pariba. E impacto tabata hopi fuerte cu e Nissan Versa a bolter y e Ford Mustang a haya hopi daño material cu ela keda total loss.
Na prome instante a papia cu ambos chauffeur tabata levemente herida, pero despues a resulta cu un a wordo trata na sitio y despues ela wordo transporta pa hospital pa un checkeo medico mas avansa.
Polis na prome instante a cera un rijstrook so, pero despues a dicidi di cera e rijbaan pa bay direccion pariba for di rotonde di Airport pa rotonde Mahuma, pasobra tur automobilista tabata pasa y slowdown un rato pa mira e accidente y esaki tabata pega e trafico y forma fila.
