Dia 25 di januari ta un dia special pa e pueblo Arubano, ya cu riba e dia aki ta recorda e fecha natal di un gran yiu di tera, estadista y luchador incansabel di e pueblo aki, esta nos Libertador Gilberto François (Betico) Croes.
Tabata na aña 1992 cu e gobierno di e tempo ey, esta Gabinete Oduber II a decreta e fecha di 25 di januari como un dia nacional; un dia cu mester sirbi como reflexion pa e generacion aki y e futuro generacionnan keda recorda Betico Croes.
Betico cu su mision special
Echo ta cu hopi tabata e politiconan den pasado cu a purba di haci algo na e sistema politico estatal, pero ningun di nan no a logra den nan intento. Betico Croes tabata un politico cu Todopoderoso a manda cu un mision special pa cumpli cune, esta saca Aruba for di e constelacion Antiyano. Betico tabata di firme conviccion cu pa por logra e ideal di un Aruba liber tabata necesario pa primeramante uni e pueblo aki. Un union cu a wordo logra door di constantemente mobilisa e masa di pueblo. Den tur e mobilisacionnan aki Betico tabata apela riba e sentimiento di patriotismo caminda tur Arubiano sin distincion di raza, religion, districto, status social etc. tabata wordo poni central.
Un lucha dedica na su pueblo
Tabata na aña 1971 cu e lider inmortal Betico Croes a haya e inspiracion pa lanta su propio partido politico MEP. E metanan principal cu durante henter su trayectoria politico el a propaga tabata structura estatal y un reparticion husto den e desaroyo economico. Den su lucha pa uni e pueblo Arubano Betico tabata e motor tras di henter e proceso pa duna Aruba su propio himno, bandera, ortografia, simbolonan di union, libertad y identidad di e pueblo Arubano. Semper el a bisa cu e ta hopi orguyoso di ta yiu di e tera aki. Pueblo a kere den su sinceridad y den e manera senciyo cu e tabata anda cu su pueblo, pasobra te awe specialmente esnan cu tabatin hopi di haber cu ne ta admir’e y apreci’e.
Henter su bida politico a ser dedica grandemente na e lucha estatal. E proceso estatal tabata uno hopi dificil y cu hopi decepcion na e momentonan clave. Sinembargo Betico, a base di sanger, sodor y lagrima, a perservera, a kita tur obstaculo den su caminda y hunto cu e pueblo Arubano a percura pa e ideal di mas grandi wordo realisa. Como gran lider y luchador politico Betico Croes tabata e vocero di e pueblo aki y specialmente riba plataforma internacional.
Curashi y determinacion
Hecho ta cu Betico Croes tabata e arkitecto, constructor y realisador di e Status Aparte entrante promer di januari 1986. Den un periodo di apenas 12 aña (1971-1983) Betico Croes a base di su curashi y determinacion a logra realisa e soño di e pueblo Arubano.
Cu awe nos tur por bati riba nos pecho, canta nos himno, hisa nos bandera y grita sin miedo Biba Aruba ta danki na e gran inspiracion cu Todopoderoso a duna e Libertador di Aruba. E homenahe di mas grandi cu pueblo Arubano por duna Betico ta di hisa e bandera y canta e himno di Aruba riba su dia special, esta riba fecha di su nacemento.
Partido MEP ta spera cu e memoria di Betico Croes lo keda bibo den curason di cada Arubiano y cu tur aña e pueblo lo sigui conmemora e estadista inmortal aki riba su fecha natal.
Un suplica ta bay na henter comunidad pa acudi na e ceremonia cultural riba diabierna anochi y e ceremonia protocolar riba diasabra mainta riba Plaza Libertador Betico Croes.
