Despues cu un cartel ta ataka un comunidad Mexicano, un grupo indigena ta recluta como 20 mucha pa sirbi como polis, E muchanan ta entre edad di 8 pa 14 aña, nan a wordo duna rifle y pida palo pa defende e pueblo di Chilapa. Siman pasa como 10 musico indigena a wordo asesina momento cu nan tawata regresando di un fiesta.
E area ta pesta di gang y pa es motibo e comunidad a lanta na mesun grupo ‘policial’. E muchanan aki a wordo entrena pa defende e pueblo for di atake di miembronan di gang. E muchanan ta bisti na berde y ta tapa nan cara cu bandana, nan ta staciona e ‘agente’ nan aki canto di e caminda cu ta drenta e pueblo.
E ‘agentenan’ aki ta haci ehercicio estilo militar pa prepara nan mes. Siman pasa mas cu 20 mucha a perde nan tata durante e atake cu a causa morto di e musiconan indigena. Algun persona a tira cu arma di candela riba nan auto causando varios morto. Algun di e muchanan cu awor ta sirbi como ‘agente policial’, ta yui di e victimanan.
E banda criminal yama ‘ Los Ardillos’ ta supuestamente responsabel pa e atake. Hopi disgusto e pueblo tin cu e presidente Mexicano, Andrés Manuel López Obrador, pa motibo di falta di seguridad den e area. E presidente ta haya critica pa su manera pasivo di atende cu cartelnan. E kier atende cu e inigualdad social y economico cu tin, uzando e lema “abrazos, no balazos”.
E area yama Guerrero ta un di estadonan mas peligroso y violente di Mexico. Cartelnan ta keda bringa otro pa control di e region pa asina facilita e traficacion di droga. Pueblonan Mexicano no ta mustra di ta haya suficiente sosten di nan gobierno, y ta dicidi di tuma accion pa asina defende nan mes. Nan ta crea gruponan cu ta cuida y patruya rond den e pueblo pa asina purba di mantene seguridad di e ciudadanonan.
