Cu hopi atencion UPP a sigui e conferencia di prensa di SERLIMAR. Atrobe a resalta con e director ta purba na hustifica e mal maneho y corupcion administrativo cu ta tumando lugar y cu ta hibando SERLIMAR na su perdicion. Splicacion di e director ta accentua mas ainda su falta di capacidad como director, mientras e ta purba na camufla e “vriendjespolitiek” y fracaso di ex minister O.Oduber.
Su incapacidad y mediocridad mas y mas ta resaltando ora cu e mes ta mustra y admiti con el a permiti ex-minister ponele baila “naar zijn pijpen” pa asina ey faborece “Friends & Sponsors”!.
Tambe e ta admiti cu NO tin un plan integral y cu desde fin di 2017 a bin ta traha AD HOC na SERLIMAR. Algo cu UPP a bin ta señala desde hopi tempo caba, pero nos por mira henter Parlamento a keda keto y laga pasa loke ta pasando. Awor nos por mira cu e partido di oposicion den Parlamento ta manera lanta for di soño y ta cuestiona. Pero esaki no ta nada straño, pasobra hustamente AVPOR ta e culpabel cu e solucion cu tabata tey, nan a percura pa boycotea esaki, cu tur e consecuencianan cu awe nos tur ta sufriendo di dje.
Nos por ripara cu banda di kier tira culpa riba otronan, e director ta mustra cu e ley mester pasa pa nan por garantisa SERLIMAR di entradanan. Pero e director, hunto cu ex-minister a demostra cu no tin un maneho financiero sano na e compania. Esaki dor cu cada bes mester a pomp mas placa den SERLIMAR. Pero pasando e ley aki nan lo haya placa pa sigui malgasta y derocha placa, y na mes momento trata na tapa nan incapacidad y mediocridad. Nos por mira cu Caft tambe a critica esaki, mirando cu cada bes gobierno mester a aumenta e subsidio na SERLIMAR. Mientras cu e “handpicked” director, cu ta “spreekbuis” di ex-minister Oduber, ta mustra cu ta e ley tin di pasa pa situacion por drecha. Esaki ta un ponencia hopi ridiculo, pasobra e situacion di Serlimar ta asina awe, danki na e ex-minister cobarde, e director mediocre y e set di harlekinnan den e Raad van Toezicht di Serlimar. Nan tambe ta culpabel di tuma tareanan cu nan no ta podera pa tuma, y busca un “incinerator” cu no tin fin di cuminsa funciona y awor cu e ley aki ta bay purba na tapa e corupcion administrativo aki.
Ta comprensibel e posicion cu sra. Daphne Lejuez a tuma contra e ley macabro aki.
Y ainda e “incinerator” chikito no ta den funcion ainda y esaki ta di 6 biaha cu nos ta tende cu ta aki “dos siman” esaki ta cuminsa opera. Pero informacion cu nos tin ta, cu parce cu e capacidad di e “incinerator” aki no ta sirbi pa Aruba. Y aki no ta trata di ningun clase di boycot, manera si a sosode tempo di Bouldin & Lawson pero aki simpelmente a cumpra un PORkeria.
Tambe nos a tende cu tin un compania di Spaña (cu un filial na Colombia) ta haciendo investigacion na Sero Teishi. Pero nos ta kere cu investigacion mester a ser haci prome cu e supuesto solucion di Sero Teishi. Mientras ta haci investigacion, ya e director ta bisa cu ta otro compania ta percura pa e holo malo.
Mescos cu algun tempo atras, e director a gaña cu na Sero Teishi no tin problema, mientras cu UPP tin potretnan cu ta mustra cu keto bay no ta usando liners, tampoco ta sefta e santo, loke ta haci cu piedranan grandi di calichi ta kibra e bales cu ta wordo deposita.
Na aparecer di UPP, tur e desaroyonan aki cu ta tumando lugar, ta pa hustifica binimento di “incinerator” grandi!! Pesey tambe un fundacion di e bario diripiente tambe a lanta y haci boroto? Ya cu tin hende lia na e fundacion aki tambe lo tin den su portofolio propaganda di SERLIMAR? Alabes tin hende den e fundacion aki ta un di miembronan di e Raad van Toezicht di Serlimar, cu a permiti y a aproba tur e fechorianan aki? Y aki ta unda cu lo tin beneficio si yuda pusha pa un W2E incinerator bin Aruba?
Un cos ta sigur, e director di SERLIMAR, e ex-minister cobarde y e “Raad van Toezicht” a haci un mal trabou y PORkeria completo. Si e director tabata preocupa pa gastonan cu tin na Sero Teishi, anto e suma di 3 miyon cu e ta paga ta paga e sponsor por tabata hopi mas abou si a laga ECOGAS a haci e trabou, ya cu enbes di e 60 florin, esaki lo por tabata 18 florin pa ton??
E falta di profesionalismo di e director tambe ta refleha riba SERLIMAR como compania. Ta tristo pa tende cu un biaha pa luna ta kima “Green Waste”, esta yerba, mata etc. Dicon no a pensa pa purba na recicla esaki y traha p.e. compost di dje? Kier bin gaba cu ta yama Meteo pa wak e biento pa e candela no molestia e bario. Ki hilaridad y alabes hopi tristo!!
E director mester “donder op” y nos ta contento cu un sindicato tambe porfin a realisa cu e director “handpicked” aki mester baha na awa mas lihe cu ta posibel, prome cu e caba cu Serlimar.
Partido UPP
Booshi Wever
22 di januari 2020