Pero El’a desea semper di ta Consehero General di Gobierno di Aruba
Oranjestad – Sr. Gilberto François ‘Betico’ Croes d.f.m. tabata un gran político, lider y estadista den historia político di Aruba. E arkitecto di nos ‘Status Aparte’. Banda di tin un biografia impresionante, Semper el a desea di ta Consehero General di Gobierno di Aruba. Como Consehero General mes su trabou no tabata facil.
Por ta tin algun persona ta pensa cu un persona manera Betico tabatin un dushi vida, pero esey ta leu di ta berdad. Mas ainda como un persona dedica, cu curashi y determinación. Betico mes a yega di bisa: “Mi no ta tata di un hogar chikito di un famia di cuater yiu, pero tata di henter un pueblo, e pueblo di Aruba”. E tabata duna atencion na tur hende unda cu e bay, aunke di tabata un persona masa ocupa mes. Tur dialuna e tabata tin dia di bishita. E tabata atende tur hende di oranan di mainta te atardi. E tabatin un habilidad di scucha y traha tempo pa tur. Betico tabata conocí como un persona di calidad humano, comprensivo, hopi correcto y sincero. Semper dispuesto pa yuda tur hende cu yega cerca dje. Su cas tabata porta habri pa tur hende. E tabata atende hende na su cas y hasta prome cu e yega trabou na Bestuurscollege. Cu su presencia positivo tabata influencia tur hende asina positivamente cu nan tabata lubida cu un rato prome nan por tabata rabia riba cualkier situacion.
Como hefe Betico tabata hopi exigente cu su secretarianan y gusta pa nan ‘file’ tur documento. Secretarianan mester a ehecuta loke ser pidi. Betico ta conoci di tabatin un tremendo memoria. E no tabata lubida nada. Ora di reunionnan su secretarianan mester ta presente na oficina y pa asisti of busca documento.
Betico tabatin hopi amor pa su mayornan. P’esey tabata encarga su secretarianan tambe pa cumpli na ocasion di hacimento di aña di su mayornan of riba dia di mama manda un areglo di flor ora cu e no ta na Aruba.
Algun di Betico su secretarianan tabata Elda Croes-Croes, Gemma Vallejo-Oduber, Grace Koolman y Silma Maduro-Oduber.
Betico tabatin un memoria fotografico y tabata corda tur hende aunke ta un biaha el’a mira e persona aki. E tabata asisti na casi tur entiero y tabata di opinion y a bisa cu semper na momento di tristeza cu un famia ta pasa aden pa motibo di perdida di un miembro di famia, ta e momentonan cu bo tin cu demostra e famia, cu bo ta comparti nan tristeza y cu bo ta compaña nan den e momentonan difícil. Betico tabata gusta tende opinión di su lidernan di bario. Esaki e tabata haci semper prome cu e tuma decisionnan importante. E tabatin contacto estrecho cu nan. Nan tabata ‘caciquenan’, manera e tabata yama nan. Betico como lider y portavoz di su pueblo a cruza fronternan pa lucha p’asina duna su pueblo locual tabata biba den su curason di cada Arubiano. Betico tabatin contacto continuo cu lidernan internacional tambe. E tabatin e don di saluda hende. Un di e lidernan internacional a yega di expresa.
Den su discurso dia 18 di maart mainta 1983 cu el a yega Aruba despues di a logra e Status Aparte El’a bisa: “Si nos a yega aki cu un barco, laga nos kima e barco aki, pasobra no tin ‘way back’.
Esaki ta djis un tiki mas di sr. Betico Croes.
Por menciona cu di berdad Betico a bay laga nos, pero a laga atras un bashi masha grandi mes. Pero e palabranan cu semper el’a uza tabata: “E felicidad cu mi ta desea pa mi propio yiunan, ta e felicidad cu mi ta desea pa henter pueblo di Aruba.” Y e otro ta “Un pueblo uni, hamas por ser hundi.” Esun tambe importante cu na diferente ocasión Betico a bisa: “Si mi cay na caminda, hamas boso laga e causa un banda, pero gara e bandera Arubano y sigui cu e lucha pa conserva y preserva e libertad di e pueblo aki”. Hopi ta e motibonan pa loke nos mester bisa: “Danki na Dje”.
Ban conmemora y celebra un Dia di Betico 2020 den grandi.
Den nomber di Gobierno di Aruba, Minister di Cultura sra. mr Xiomara Maduro y Comision Celebracion Dianan Nacional ta invita henter e pueblo di Aruba pa e Manifestacion Cultural riba diabierna 24 di januari 2020 di 07:00 pm pa 10:30 pm y e Ceremonia Protocolar riba diasabra 25 di januari 2020 di 09:00 am pa 11:00 am, ambos riba Plaza Libertador G.F. ‘Betico’ Croes na Vondellaan. Pa e booklet/foyeto tocante sr. Betico Croes subi e website: www.beticocroes.aw y descarga esun di bo.
Hisa bo bandera di Aruba duna respet y honor na nos Dia di Betico.
Informacion di e buki G.F. Betico Croes, 1938-1986 Nos Libertador cu ‘Determinacion’.
Stan Dabian
PR-CCDN