Hulanda – Despues di un inspeccion haci den e abattoirnan Hulandes hopi abuso y trato inhumano di bestia a sali na cla. Ley Hulandes ta prohibi di mata porco cu ainda ta na tino, pero durante investigacion a resulta cu tin varios abattoir cu no ta tene nan mes na e ley aki.
Un inspector a raporta con porconan ta wordo hinka den bakinan grandi di awa herbi, esaki ta haci e proceso di kita cabey supuestamente mas facil. Momento cu e porco ser hinka den e baki di awa herbi, e ta keda bati y ta basicamente kima bibo. E bestia ta consciente y ta sinti tur e dolor di esaki. Sigur un sufrimento cu por a wordo preveni, segun e inspector.
Den e rapport tin 6 ocasion unda porconan cu ainda ta bibo y totalmente consciente ta wordo tira den baki di awa sumamente cayente. Den realidad nan ta bisa cu sigur esaki ta un practica cu regularmente ta sosode y cu e inspectornan no por tin control riba tur cos 24/7.
Un otro inspector a mira con porco ta wordo treci na e matadero y laga den nan mesun excremento, orina y otro sushinan. E inspector, como un profesional cu tin experticio veterinario, a analisa con e porconan tawata tin caba scheurnan y cortonan grandi na nan curpa (esaki probablemente ja prome cu nan a yega e abattoir). Tur e dolornan y sufrimentonan aki na un animal cu ainda ta bibo.
Regularmente porconan cu ainda ta bibo ta wordo poni hunto cu otro cadavernan. Nan ta wordo poni entre otro animalnan morto, ora cu ripara cu esaki ainda ta bibo e personal di e abattoir ta hinka e porco cu cuchiu pa asina e sangra y consequentemente fayece.
E rapport a wordo yama ‘Varkens in Nood’, pues ‘Porconan den necesidad’. Ta wordo pidi pa tin mas control riba e abattoirnan Hulandes. A bin cu e sugerencia pa haci esaki via un sorto di ‘livestream’. Hopi di e lugarnan aki ja tin camara y asina un persona por controla si e matansa ta wordo haci na un manera mas etico.
Mayoria di e dieta humano ta consisti di productonan animal. Ta obvio cu tin un demanda y necesidad pa locual ta cria (y matansa) di bestia. Ta di enfatisa si cu por haci esaki na un manera mas etico y humano. Dietanan vegano y vegetario ta birando mas y mas popular pa motibo di e crueldad pa locual ta e trato y claro matamento di bestia.