Caya Vries, San Nicolas: Diahuebs algo prome cu 6’or di atardi, famia ta bati alarma, pa motibo cu un ser keri di nan tabata trahando bou di un auto y e jack di e auto a hala cu consecuencia cu e auto a cay riba e homber, lagando e seriamente herida. Mesora a manda polis y ambulance na e adres den Caya Vries
Na yegada nan a bin topa cu un homber herida y a bin compronde cu enberdad e homber tabata trahando bou di e auto, na momento cu e jack di e auto a hala y e auto a cay riba e homber. E auto a keda riba e homber, pero asina mes ela logra cu poco esfuerzo sali for di bou di e auto. E homber tabata herida y tabata tin hopi dolor na pecho y no por a move bon mas.
Personal di ambulance a trat’e na e sitio y despues a transport’e pa hospital, pa e haya un tratamento medico mas avansa.
