Home Local DESPUES DI FASE PILOTO ARUBA TOURISM AUTHORITY TA LANSA AQS: E PROME...

DESPUES DI FASE PILOTO ARUBA TOURISM AUTHORITY TA LANSA AQS: E PROME GRUPO DI ARUBA QUALITY SEAL (AQS) A WORDO CERTIFICA OFICIALMENTE

SHARE

ORANJESTAD – Aruba Tourism Authority ta reconoce e necesidad di semper ta un stap pa dilanti pa Aruba permanece competitivo riba mercado internacional. Y pa e motibo aki Aruba Tourism Authority a tuma e iniciativa pa bin cu un programa di certificacion pa negoshinan.

KICO TA ARUBA QUALITY SEAL – AQS?
E programa di Aruba Quality Seal ta diseña pa promove y midi calidad di producto y servicio di negoshinan, cu e meta pa esnan cu ta participa/certifica por sigui satisface y surpasa expectativa di consumidornan.
A.T.A. ta confia cu Aruba Quality Seal lo bira un herment di desaroyo den negoshi y asina establece y yuda mehora e nivel di profesionalismo y standard den nos industria turistico. E compania QESH services, certifica na Aruba pa mas cu 25 aña, a percura pa ehecuta e proyecto piloto aki y a opera tambe como consehero pa asina sigura cu e proyecto ta uno integro y productivo.

Durante e fase di investigacion y coleccion di data pa asina crea e programa aki, mas cu 12 otro programa internacional a wordo evalua. Diferente dialogo cu expertonan y participantenan potencial a tuma luga pa asina desaroya un lista di criteria cu ta aplicabel pa Aruba Quality Seal, cual criteria ta uza pa haci chekeo na diferente negoshi.

Den e fase piloto, 14 compania di sectornan di retail, restaurant y actividadnan a participa, cual tawatin un duracion di 10 luna.
Aunke cu e enfoke di e programa pa awo lo tawata riba restaurant, actividad y retail, den futuro lo añadi mas sector. Ademas, Aruba Quality Seal ta conta cu un plataforma online/digital pa facilita e proceso como tambe pa inicia e auditoria unda ta haci’e mas facil pa registra, participa y ricibi guia.

KICO TA BENEFICIO DI E PROGRAMA PA NEGOSHINAN?
Algun di e beneficio pa e negoshinan cu ta completa y obtene e certification ta entre otro cu e clientenan ta mas satisfecho cu e servicio cu nan ta ricibi – nan tin mas confiansa den e negoshi- basa riba e hecho cu nan operacion tin un cierto “standard” y complaince pa cu esaki. Ademas e negoshinan por mira un incremento den nan ingreso y mas stabilidad como tambe e moral di e empleado ta aumenta.
Un programa internacional di e estilo aki normalmente ta hopi costoso. Sinembargo, A.T.A. a subsidia un porcion grandi di e formulacion y creacion/adaptacion di e programa pa e negoshinan. Ademas di mantene e gastonan abao, A.T.A. ta brinda un incentivo unda cu e companianan cu pasa e programa ta ricibi un descuento.

AQS lo promociona e companianan cu wordo certifica riba diferente plataforma pa asina añadi balor na e programa. Esaki ta djis algun di e beneficionan cu e participantenan por spera ora di participa den e Aruba Quality Seal.

CERTIFICADONAN DI E PROYECTO PILOTO
Durante un anochi hopi ameno, e siguiente participantenan di e proyecto piloto a completa y ricibi nan certificacion:
Restaurantnan cu a wordo certifica ta: Que Pasa – Gianni’s & Azia – Westdeck – One Happy Bowl.
Tiendanan certifica: Cosecha – Aruba Aloe – Maggy’s Store – Rage Silver
Operador di tour certifica: Clear Kayak – Red Sail Sport – Fofoti – Kinikini – Balashi Brewery Tour

Durante su discurso, Ronella Tjin Asjoe-Croes a laga sa cu: “Adicionalmente di e programa di certificacion Aruba Quality Seal, A.T.A. como e ‘Destination Marketing and Management Organization’ di Aruba ta orguyoso di por conta tambe cu e dos programanan importante dirigi riba nivel di servicio cu ta e programa di Happy Information Officers (HIO) y e Aruba Certification Program (ACP), ambos cual ta resorta bou di Aruba Excellence Foundation.”
“Tur esaki ta instrumentonan cu ta contribui na un experiencia cualitativo di nos destinacion, cual sigur ta loke nos ta desea pa un desaroyo di turismo sostenibel” asina Tjin Asjoe-Croes – CEO di Aruba Tourism Authority a añadi.

Palabranan di gradicimento ta bay na tur esnan cu a coopera pa e programa aki a bira un realidad. Tambe ta urgi ademas companianan na Aruba pa join e programa di Aruba Quality Seal, unda por medio di bo participacion por pone enfoke riba calidad, dedicacion y servicio pa bo clientenan y Aruba henter. Pa mas information por bishita nos website www.aqs.aw.