Home Politics Parlamentario Benny Sevinger (AVP): Gabinete Wever Croes ta sigui maltrata contratistanan chiquito

Parlamentario Benny Sevinger (AVP): Gabinete Wever Croes ta sigui maltrata contratistanan chiquito

SHARE

Awor a kita nan bonus !

“Systematicamente Gabinete Wever Croes ta sofocando esnan mas
vulnerabel den nos comunidad. Atrobe e contratistanan chiquito na DOW
ta victima di un otro decision di corta den nan pago. E biaha aki a
kita nan bonus di fin di anja cu tabata entre Afl 650,== florin pa Afl
1350,== pa anja”, esaki parlamentario Benny Sevinger a denuncia cu
pruebanan den su man.

Contratistanan Chiquito segun e contract den articulo 29 tabata tin
derecho riba un bonus ora nan cumpli debidamente cu nan trabao. E
bonus aki ta pa bon prestacion cu nan a haya den tempo di Minister
Sevinger mes. Pa hopi contratista e suma tabata core entre 650 pa 1350
florin.

Contratistanan chiquito awor ta worde forza dor di Gabinete Wever
Croes pa firma cu ta elimina e bonus aki. Esaki ta e forma di opera di
e gobierno esaki Sevinger a denuncia. Di un banda ta caba di duna e
suma 25 florin riba salario minimo y di otro banda ta kita 1350
florin di e mesun contratista chiquito. Un abuso di marca major.
Gabinete Wever Croes ta kita dobel di locual nan a gaba cune na
aumento di salario minimo’, parlamentario Sevinger ta reclama.

Parlamentario Sevinger ta bisa cu lider di Partido, Mike Eman ya na
diferente ocasion a mustra riba e abuso cu ta hacienda cu e
contratistanan chiquito. Na e momento aki lider di partido, Mike Eman,
ta sosteniendo su esposa Doina den un quebrante di salud, pero mi tin
contacto cune y e ta solidario cu e contratistanan chiquito y hopi
pendiente pa nan worde defendi, parlamentario Sevinger a splica.

Na final di anja caba e promer mitar di e bonus a worde kita. Lider di
AVP, mr. Mike Eman na e momento ey a sali mustra cu atrobe decisionnan
ta cai cu ta perhudica e contratistanan chiquito aki di famianan
humilde. Esaki a sosode hustamente den fin di anja cu mas famianan tin
mester di nan entrada. E momento ey Gabinete Evelyne Wever Croes a
tuma un otro medida inhusto cu a afecta severamente e entrada di e
contratistanan chiquito cu ta traha pa DOW.

Tambe Gobierno a dicidi pa forza contratistanan chiquito inhustamente
den mas dia liber sin pago den fin di anja. Gracias na protesta di
Lider di AVP, Mike Eman y intermediacion di mediador, Anselmo
Pontilius, e decision aki a keda revoca, pero e kitamento di mitar di
bonus a keda un hecho. Awor ta henter e bonus ta bai worde kita segun
e papelnan cu a cai den man di parlamentario Sevinger.

Na final di anja Mr. Mike Eman a bisa di no ta compronde kico ta
intencion di Gabinete Wever Croes pa cu e famianan humilde aki. Promer
a mira un persecusion partidario cu a kita un cantidad di contratista
chiquito puro pa motibo di nan color politico y awor ta impone e
medida inhusto aki riba e contratistanan chiquito. Hunto cu e
medidanan cu a aumenta costo di bida ferozmente, cuanto abuso mas
Promer Minister Evelyne Wever Croes ta kere cu e pueblo aki por
soporta, e lider di AVP, mr. Mike Eman a subraya cu hopi preocupacion
despues di a scucha e dolor adicional aki di contratistanan chiquito.

Parlamentario Sevinger ta mustra cu na e momento aki por mira cu
locual Lider di Partido Mike Eman a denunca na final di anja a bira
hasta peor cu e decision awor di kita e bonus completo di
contratistanan chiquito. Pocierto parlamentario Sevinger ta bisa cu
locual ta sosode aki mester worde hiba dilanti corte, pasobra un
homber chiquito ta worde forza pa accepta un adaptacion den su
contracto cu ta na su desbentaha, pero esun cu e poder ta malusa esaki
y forza e contratista chiquito pa accepta eliminacion di bonus regla
den articulo 29. Sino lo tin consequencia pa nan contract, esdesier
nan por wordo kita bao cualkier pretexto y perde nan pan y di nan
famia.

Claramente esaki ta mustra cu ta recorte ta bai tin den presupuesto di
DOW pa 2020 y minister ta obliga director pa cumisa cu e
contractistanan cu ta mas vunerabel. Si mira con gasto a subi pa e
conratistanan aki a rais di tur e medidanan cu e gobierno aki de
Evelyn Wever Croes a tuma, nan a perde mas di 10% di nan entrada caba,
awor ta bolbe dalnan un sla bao faha kitando nan bonus.

Pero pa un conferencia de marijuana si gobierno a pone 2 miyon florin,
pa ministernan biaha rond mundo si gobierno a pone 6 miyon, pa
abogadonan di famia si gobierno a pone miyones sin conta tur e
familiarnan di ministerna cu ta cobra salarionan barbaro mas 25% di
toelage costanado miyones.

Parlamentario Sevinger a termina bisando cu embes di gobierno compensa
e contratistanan aki pa tur loque nan a perda na medidanan, awor ta
kita mas. E gobierno aki di Evelyn Wever Croes no tin curazon pa nos
pueblo, sla pa pueblo basta nan si biba bon. AVP lo ta hunto cu e
contratistanan aki pa bringa pa nan derechonan.