Home » Falta di transparencia “Pueblo no sa di mas medida y trahadonan no sa kende lo bay cas” Parlamentario Marlon Sneek

Falta di transparencia “Pueblo no sa di mas medida y trahadonan no sa kende lo bay cas” Parlamentario Marlon Sneek

by Admin
0 comment 38 views

Gabinete Wever Croes no ta transparente, no ta duna pueblo y Parlamento informacion y esaki ta e gobierno cu a priminti cu bos halto cu nan lo bay bira e gobierno cu ta mas transparente cu ningun otro cu Aruba a yega di conoce.
Marlon Sneek, lider di fraccion di AVP den Parlamento a mustra cu awe aki aya por scucha algo di e manehdo di gobierno y despues di carambola leynan ta yega parlamento caminda e fraccionnan cu ta sostene gobierno, no ta haci ningun pregunta na gobierno pero a djis grita ‘voor’ lagando pueblo carga e consecuencianan.
“Esey ta e situacion cu nos tin na e momentonan aki den e pais aki y ta algo tristo sigur ora cu nos mira cu Minister Knops ta bishita Aruba den un biahe relampago, caminda e no a reuni cu Parlamento, caminda e por haya y scucha inkietudnan existente pero si ta bay tras di loke gabinete Wever Croes ta bise.
Nos a scucha e mandatario Hulandes tambe bisa cu cosnan ta transparente pero ta bon pa pone Knops na altura cu nada ta transparente cu e gobierno aki, ya cu Parlamento no ta haya documento, Parlamento no ta haya informacion for di gobierno.
Por ehempel den e caso di e compania Aruba Airlines, fraccion di AVP a dirigi pregunta na e Minister concerni pero no a ricibi contesta algun, ya cu no tin transparencia pero awe nos por mira con un bom ta rementa den nos cara den noticianan internacional cu ta mustra cu Aruba Airline ta den un proceso cu no ta corecto.
No tin transparencia na Aruba, esey ta e realidad cu nos ta bibando den nos pais pero loke si nos por a saca afo for di Minister Knops su declaracionnan duna, ta cu e KB ta riba mesa ainda y cu gabinete Wever Croes conoce contenido di e KB y cu gobierno ta ehecutando e KB aki sin cu el a Sali.
Nos por a saca afo di informacionnan ricibi cu sr Knops a bisa gobierno di Aruba cu presupuesto 2020 mester bin y cu e no kier mira un presupuesto cu tin un cero plus, a base di entradanan incidental y den otro palabra, bay tuma medida pa garantisa cu e entradanan aki ta fiho tur aña.
No entradanan caminda ta bisa cu gobierno ta bay haya dividendo for di companianan estatal, ya cu asina lo laga e companianan masacra pueblo, ya cu por a mira cu caminda pueblo lo mester a haya un reduccion di 25 cen riba nan recibo, pueblo a ripara cu nan a haya 9 cen so di reduccion anto gobierno a keda cu e 16 cen pa gobierno sigui strika mas dividendo.
Tambe nos por a saca bon cla afo di tur loke ta ser comenta cu pa loke ta e parti di persona, Minister Knops a bisa cu a informa gabinete Wever Croes cu nan mester bay corta den personal, algo cu lider di fraccion di MEP, sr Tjong durante di su disertacion durante reunion di IPKO siman pasa, a confirma cu lo mester bay baha cantidad di personal di gobierno.
Pues retiro di trahadonan publico tambe ta den tapara pero un biaha mas por mira cu gabinete Wever Croes no ta sincero cu pueblo, no ta bin dilanti y bisa pueblo kico realmente pueblo tin cu spera den e aña nobo aki cu a caba di cuminsa.
Ta bin acerca cu ora nos tuma nota di contenido di e carta cu Prome Minister Evelyn a manda Hulanda, e ta bisa bon cla cu loke ta e ley di CAFT en berdad su gobierno a pone esaki un banda, ya cu Parlamento a entrega un amienda cual Minister Knops a bolbe reteira cu e amienda aki a daña e ley pero cu tin palabracion cu Minister cu lo keda ehecuta e ley sin aprobacion di Parlamento y sin e cambionan propone pa Parlamento di Aruba y cu e lo wordo ehecuta a base di e protocl cu a wordo firma pa Minister Presidente y Minister di Finansa cu gobierno Hulandes.
Aki claramente por miram c’un biaha mas gabinete Wever Croes ta coy Parlamento pone un banda y ta haci loke nan kier y pa fraccion di AVP esaki ta di lamenta ora cu nos mira cu no tin transparencia, cu tin nada riba mesa pa por debati riba dje y loke ta mas serio ainda, pueblo no sa kico ta spera pueblo den aña 2020 aki, cu atrobe ta trece incertidumber den e totalidad,” Parlamentario Marlon Sneek a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio