Finanzas publico, Venezuela y relacionnan den Reino ta algun di e topiconan cu sr. Knops y Minister President sra. mr. Evelyn Wever-Croes a toca durante nan reunion. Pero loke a resalta ta cu e Minister Hulandes a bisa durante su conferencia di prensa cu e ta contento cu e colaboracion cu Gabinete Wever-Croes y cu e maneho di sra. Evelyn Wever-Croes ta positivo.
REACION SR KNOPS
Sr. Knops a duna di conoce cu e ta satisfecho cu e relacion di trabou entre Hulanda y Aruba y tambe cu Gabinete Wever-Croes ta atende cu puntonan di mehoracion na un manera responsabel. Na mes momento sr. Knops a bisa tambe cu e palabracionnan haci na November 2018 cu Hulanda ta wordo logra.
E maneho di e ultimo 2 añanan ta wordo caracterisa como positivo pa sr. Knops y e ta mira cu tin pasonan significante a wordo poni pa yega na finanzas duradero y solido. Y pa loke ta nos economia sr. Knops ta wak cu esaki ta bayendo bon.
MANEHO GABINETE WEVER-CROES
Pa fraccion di MEP e reaccion positivo di sr. Knops no a bin como sorpresa. Na diferente momento nos a trece padilanti con e maneho di sra. Evelyn Wever-Croes ta percura pa saca nos como pais for di e situacion penoso cu Mike Eman a hinca nos aden.
Na 2019 pa di dos biaha e Liderazgo di nos Prome Minister Evelyn Wever-Croes a conduci na e hecho cu pais Aruba a conoce un presupeusto Supletorio “saldo neutral’. Caminda Mike Eman tawata traha presupuestonan ficticio y na fin di aña mester a pidi 444 miyon florin extra, na 2019 e Liderazgo di Evelyn Wever-Croes a conduci cu nos conoce presupuestonan realistico y cu no mester di fondo adicional na fin di aña.
PA CONCLUI
Presupuesto 2020 lo conoce un surplus. Esaki ta marca un era nobo, un era di finanzas saludabel y un era di bon gobernacion. Liderazgo di nos Prome Minister lo conduci na finanzas saludabel, un economia cu ta crece (segun Banco Central), rebaho di nos desempleo (segun rapport di Departamento di Labor) y un turismo cu lo sigui crece na 2020 cu 2.8%. Y ta esaki ta e pasonan significante cu sr. Knops tawata referi na dje.