Home » Parlamentario Hendrik Tevreden ta indica cu nunca e trabounan a para. “Parlamento ta intensifica trabounan riba e tema di proteccion di nos muchanan aun mas e aña aki”

Parlamentario Hendrik Tevreden ta indica cu nunca e trabounan a para. “Parlamento ta intensifica trabounan riba e tema di proteccion di nos muchanan aun mas e aña aki”

by Admin
0 comment 75 views

Manera cu ta conoci dia 1 di juni 2019 a drenta na vigor articulo 243 di e Codigo Civil nobo unda ta regula e posicion, tareanan y autoridad di un punto central pa conseho, sosten, registracion di tur caso y preocupacion cu tin di haber cu abuso y negligencia di menor. Den e caso aki Bureau Sostene Mi ta apunta como e departamento central pa ley unda tin di registra tur caso of preocupacion di e asina yama Meldpunt. No solamente esey, pero tambe Bureau Sostene Mi ta informa instancianan concerni y duna conseho cua ta e pasonan cu por wordo tuma.
Pa evita cu ta keda solamente na registracion, nos ta concentrando hunto cu apoyo tecnico di Augeo Foundation di Hulanda y UNICEF pa e implementa e caminda con e proceso tin di cana. Nos no kier ripiticion di leynan cu no por wordo ehecuta na un bon manera debi cu e proceso no ta cana den practica. P’esey ta trahando ariba e accionnan specifico cu cada departamento of organisacion tin di tuma na momento cu registra un caso di abuso di menor. No tin espacio pa e scenarionan grave keda ripiti den nos comunidad, y esaki ta un di e motibonan principal cu a acerca Augeo y Unicef cu tin amplio trayectoria y conocemento ariba e materia aki. Augeo Foundation a yuda den e introduccion di meldcode contra abuso di menor na juli 2013 aya na Hulanda. Y ta train un pro-medio di 60 mil profesional Hulandes riba e tema aki pa aña.

Den e temporada tras di lomba conscientemente a scoge pa ta menos den prensa cu e avancenan ariba meldcode, mirando cu e ta un topico hopi sensitivo y hopi bes e ta wordo poni den un contexto politico pa lag’e mustra manera populismo. ‘Nos no por haci politikeria cu cosnan serio cu a y ta causa hopi dolor na famianan; nos ta traha pa mehora nan si’, Tevreden a splica.
Atrabes di e crisis plan social a bin ta atende cu e topico aki y otro problemanan social den nos comunidad. Y apesar cu nos sa cu tin hopi mas cu tin di wordo haci pa nos yega unda nos kier ta como comunidad, nos ta mira un adelanto den esakinan.
P’esey mes ta habri aña intensificando aun mas ariba e topico aki, pasobra nos tin cu percura cu awor cu tin tur e instancianan aki sinta na mesa pa haci di un bes e mihor producto posibel pa brinda proteccion y garantisa ayudo na tempo specialemente pa nos muchanan y man duro pa esnan cu ta comete tipo di actonan baho aki.

Mientras tanto ta importante pa haci conoci cu programanan di conscientisacion di mucha pa pronto esakinan wordo introduci na Aruba y p’asina kibra e tabu y habri dialogo ora cu situacionnan di mishimento of hasta abuso presenta. Durante e reunionnan di presupuesto 2020 lo sigui enfatisa riba e necesidad pa pone atencion riba e topico aki y sondea unda mas departamentonan mester di mas apoyo specifico.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio