Oranjestad, Diadomingo den oranan di atardi, polis ta haya un informe cu un auto lo a dal un ciclista na altura di Seaport Market Place, mesora a manda polis y ambulance na e sitio.
Na yegada nan a bin topa cu un ciclista herida, na momento cu nan a papia cu e chauffeur di e auto, un Toyota Yaris preto, ela bisa polis cu e no a dal niun hende cu auto. Polis no por a mira niun rastro riba e auto cu e chauffeur lo por a dal e ciclista cu e auto, notabata tin niun marca of daño riba e auto.
Na e sitio nan a bin compronde cu e chauffeur di e auto y e ciclista riba L.G.Smith Boulevard tabata bayendo direccion pariba, pero e dama chauffeur lo a bira na su man drechi pa drenta e parkinglot y no lo a pone tino cu tabata biniendo un ciclista y a bira su dilanti, causando cu e ciclista pa e no dal contra e auto a maniobra y a cay cu su bais.
Personal di ambulance a presenta na e sitio y a trata e ciclista.
