Teheran: Diasabra Iran a admiti cu e ehercito Irani ‘ sin motibo” a benta e avion di Ucraina abou, net un rato despues cu e avion a lanta for di aeropuerto di Teheran cu 176 pasahero abordo. Segun e medianan di estado Irani ta papia di un fout humano.
Un commandante di e Guardia Revolucionario Irani, a bisa cu su unidad ta tuma tur e responsabilidad pa cu accidentalmente a benta e Boeing 737 di e compania aereo di Ucraina a bou.
General Amir Ali Hajizadeh
E General Amir Ali Hajizadeh a declara dilanti television Irani, cu ora ela tende cu e avion cu 176 pasahero a cay, ela desea cu e mes tabata morto. Esun cu a lansa e raket aki, a haci esaki riba su mes, pa motibo cu na e momento ey tabata tin un storing den e lineanan di comunicacion.
Segun Hajizadeh a sigui declara:”esun cu a lansa e raket tabata tin menos di 10 seconde pa a tuma e desicion, mirando cu e ehercito Irani, ta den un estado di alerta hopi halto door di e tension creciente entre cu Merca, nan lo a mira e avion pa un raket di e pais enemigo. E boeing a wordo benta abou cu un raket di corto distancia. E raket a expltoa banda di e avion y despues ela perde haltura y a cay.
Restonan di e avion cu a wordo benta abou pa militarnan Irani
Na prome instante Iran a desmenti cu ta e militarnan Irani mes accidentalmente a benta e avion, den cual 82 pasahero tabata di nacionalidad Irani y Diasabra a bin admiti y a bisa awo cu nan lo haci tur cos den nan alcanse pa persigui tur esunnan cu tabata responsabel pa e fout aki.
E premier di Canada Trudeau ta insisti, ‘cu awo cu Iran a admiti di a benta e boeing di Ucraina abou, pa bin un investigacion transparente y profundo den e caso aki’. Tambe segun Trudeau, e caso aki mester wordo atendi y cera hopi liher, tambe mester bin cu acuerdonan di responsabilidad.
Premier Trudeau di Canada
Den e accidente aereo aki tabata tin 57 pasahero di nacionalidad Canades, no mane na prome instante a bisa cu tabata tin 63, diabierna ultimo Canada a duna e informacion oficial cu ta 57 persona di nacionalidad Canades.
“E gobierno Canades ta spera di haya pleno cooperacion di e autoridadnan Irani” esaki segun e Premier, cu di den siman caba a duna di conoce cu e avion a wordo benta abou pa Iran.
E presidente di Ucraina, Zelensky tambe kier un investigacion profundo y transparente, e ta pidi tambe un declaracion completo di culpa di parti Iran. “E Diasabra mainta aki a trece e berdad dilanti”. E management di e aereolinea internacional di Ucraina a reaciona, bisando “cu tur e tempo aki nan tabata sigur cu e compania no tin niun culpa di locual a sosode cu nan avion diaranson ultimo”.
Presidente Zelensky di Ucraina
Nan a sigui bisa cu “Nos niun momento a duda den nos tripulante y nos avion, cu nan a causa e teribel catastrofe aki. Segun facebook di un di e managernan di e aereolinea ” Nan tabata e miho personanan, referiendo na e tripulante y e dos pasaheronan di Ucraina cu tabata abordo di e avion y cu a lanta for di Teheran cu destino Kiev, cu ta e capital di Ucraina.
Aereolinea internacional di Ucraina
