Mabon: Diasabra den careda di 2’or y mey, presencia di polis a wordo pidi cu urgencia na un adres na Mabon, esaki na momento cu un señora hopi spanta a yama y tabata pidiendo pa presencia di polis cu hopi urgencia na su cas. E motibo tabata cu 3 homber desconoci a yega na su cas y a cuminsa destrui tur e glasnan di su auto y despues a cuminsa kibra de glas di su bentananan di cas.
Na yegada enberdad nan a bin topa cu un señora hopi spanta, e señora a conta polis, cu e tabata su so den cas, na momento cu tres mucha homber hoben, completamente desconoci pa e su persona, a yega na su cas y a cuminsa comete destruccion na su auto y tambe a kibra su bentananan di cas. E tres hobennan aki a core bay for di e sitio, mesora polis a cuminsa busca den e area. Polis a logra pone man riba un di nan, e tabata bou influencia, mientras e otro dosnan a logra huy.
Mesora polis a transport’e cu dogcatcher pa warda di Polis na San Nicolas.
Segun e habitante di cas e no tin problema cu niun hende y no tin yiu tampoco cu lo por tabata tin problema cu algun hoben, mas sigur ta wordo sospecha cu e tres hobennan aki, lo tin problema cu un persona, pero a ekiboca di adres y a comete destruccion na cas robes.
E caso di destruccion aki, a wordo pasa den man di recherche pa mas investigacion.
