Dia 8 di januari 2020 Parlamentario Tromp-Lee a bay di bishita na Parke Curason na
Yaburibari. Segun Tromp-Lee despues cu recientemente un biaha mas el a duna atencion
mediante un rueda di prensa na e condicion di diferente facilidad deportivo cu ta propiedad di
Fundacion Lotto pa Deporte y FFD, mas y mas e ta keda acerca pa cu e topico aki. P’esey e
ta haya necesario pa keda duna atencion na e situacion penoso di e facilidadnan aki. Manera
aña a habri Tromp-Lee a dicidi pa cuminsa bishita e facilidadnan un biaha mas. Tempo el a
bira Parlamentario ya caba el a pasa bishita mayoria Facilidadnan Deportivo. Y di e tempo ey
caba el a ‘trek aan de bel’.
Su bishita a inicia na Parke Curason. Tromp-Lee ta enfatisa cu e ta sinti un dolor y tristeza
inmenso pa wak e condicion penoso cu e lugar ta aden. Parke Yaburibari ta propiedad di
Fundacion Lotto pa Deporte y Fundacion pa Facilidadnan Deportivo ta maneha e facilidad pa
nan. Parke Curason ta un lugar cu diariamente ta keda uza pa chikito, hoben y grandi. Un
lugar multifuncional caminda por practica deporte, recrea y mantene condicion door di
movecion. Un lugar pa henter Famia.
Tromp-Lee ta indica cu ta un lastima cu Fundacion Lotto pa Deporte no ta cumpli cu su deber
pa mantene e facilidad aki. E speeltuin ta den mal estado y por ta peligroso pa nos muchanan
mirando cu e co’i hunganan ta hopi frustia of kibra. E overdekte speelplaats tambe e
framework ta hopi frustia y tin mesun problema cu na e veldnan na Pos Chikito cu frusto ta
cay manera strooitjes, cual sigur por ta un peligro pa publico. E Johan Cruyff Court tambe no
ta den e miho condicion. Pa loke ta trata e cas pa actividad di 60+ y e pista pa bikecross,
esakinan ta cera y no ta keda uza. E prome Tromp-Lee ta bisa cu esey a keda afgekeurd y no
mag keda uza. Pa loke ta trata e pista di bikecross e no sa dicon e ta den un estado asina
deplorable y ta cera. E ruta pa cana ta na varios parti den super mal condicion, tin hopi scheur
y na diferente caminda e caminda a zak. Tur e puntonan di parada pa por haci ehercicio cu tin
banda di e ruta di cana no por wordo uza mas mirando nan situacion. E aparatonan y e cancha
pa skate tambe mester haya nan atencion debido. Tromp-Lee ta subraya cu overall e facilidad
ta den un situacion hopi penoso y falta di mantencion. Hopi tristo y bergonsoso cu
Fundacion Lotto pa Deporte no ta percura pa su propiedadnan.
Segun Tromp-Lee, un noticia positivo tin y esaki ta cu porfin despues di hopi luna tin papel
di wc bek pa publico por uza bañonan na un manera decente. Pasobra ni pa esey tabata
percura manera mester ta.
Mirando cu e situacion ta pio cu 2 aña pasa Parlamentario Tromp-Lee un biaha mas ta haci
un suplica y peticion special na Directiva y Director di Fundacion Lotto pa Deporte pa
cuminsa pone prioridad na mantencion y cuido di nan Facilidadnan deportivo.
Sigur Parke Curason na Yaburibari a demostra su balor agrega y cu e ta un necesidad pa
pueblo. Si nos sigui lag’e bay atras asina, pueblo lo por perde un hoya di facilidad deportivo,
cual segun Tromp-Lee lo ta un lastima.