San Nicolas – Cuerpo policial ultimamente a y ta keda pasa den momentonan menos bon, pa pone na un forma poco netchi. Varios incidente den e Cuerpo a mira luz di dia, pero varios tambe ta keda bon tapa bou brasa.Tur cos ta depende tambe di ken a comete e pifia.
Den luna di december 2019 a sosode dos incidente cu no a mira luz di dia, dos incidente toch poco serio y cu no a sali na cla, esakinan lo a keda bon scondi den e palabra “Integridad.” Pero Aruba ta un isla chikito y hopi cos tardi of trempan lo mira luz di dia.
Save a Lot, San Nicolas
Ambos caso a sosode pariba di brug y tabata den dia.
Un di e casonan aki tabata ariba e parkeerplaats di Save a Lot situa na Weg Sero Preto, informacion a drenta cu tin un persona burachi den un auto.Tene na cuenta cu ta den dia cla y no anochi of marduga.
Na yegada polis of esnan cu lo a wordo avisa, a bin topa cu un Dienstwagen cu ta pertence KPA.Den e auto tabata tin un agente di rango di Fam E(59) e tabata basta burachi.Mesora esnan cu a yega na e sitio a move cune, pa asina minimalisa e daño cu esaki lo a causa un biaha mas na e fama di KPA.
Do It Center, Savaneta
Esaki ta e otro caso cu tambe a sosode den luna di december ultimo.
Un otro agente tambe di rango a haye envolvi den un accidente na altura di Do It Center na Savaneta.E agente aki di Fam L(55) tabata bou influencia, pero no di alcohol. Segun nos tin entendi, cu e agente aki tin dependencia/adiccion na cierto medicamento cu ta prohibibo di maneha auto of traha cu machine.
E agente aki tambe tur cos a wordo “coregi” mesora, evitando asina mas escandalo y mal fama pa e Cuerpo. Tur cos ta depende ken bo ta y con lihe bo wordo yuda, paso si bo tin un poco mala suerte, te hasta video of potret lo skeiro rond di bo riba red social, cu e consecuencia cu e agente lo wordo manda cas, pendiente investigacion.
Ambos agente ta traha na warda pariba y ambos agente ta trahando ainda, sin di a wordo manda cas pendiente investigacion.
Esaki ta e tipo di preguntanan cu constantemente ta wordo haci ariba caya, dicon no ta publica e articulonan di e polisnan burachi? of tal agente si y tal agente no. E contesta ta simpel, ta depende ken bo ta.
Pues esaki ta pa haya un idea con e liña ta core den e organisacion integro aki.