Tension creciente entre Merca cu Iran
Diadomingo mas di 100 mil hende a tuma despedi di e General Qassem Soleimani di Iran. Esaki despues cu Diasabra caba a tuma luga diferente procesonan funeral na Irak. e curpa di Soleimani a wordo transporta cu avion for di Bagdad pa Ahvaz, un cuidad Sur Este di Iran, eynan mas di 10 mil hende a asisti na e ceremonia.
E curpa di Soleimani a wordo transporta diadomingo mainta cu avion for di bagdad pa Ahvaz
Despues e restonan mortal di Soleimani a wordo transporta pa Mashhad, cu ta un di e cuidadnan mas religioso y mas importante di Iran. Un stoet enorme di hende a cana bay direcion di e Mausoleo di e imam Reza.
Un stoet enorme mas di 100mil hende na Mashhad
E ceremonianan na Ahvaz y Mashhad ta dos di e varios otro ceremonia cu autoridad Irani a planea na honor di Soleimani.
Un orador na e ceremonia na Mashhad, a bisa” Nos ta 80 miyon Irani y si cada un di nos pone un dollar, nos lo tin 80 miyon dollar y cu esaki nos lo por premia esun cu lo por trece e cabes di Trump pa nos”. E ceremonia aki a wordo transmiti via diferente media y canalnan di television.
Door di e multitud enorme presente na Mashhad, a dura casi dos ora pa e stoet por a pasa door di e multitud di hendenan cu tabata presente, pa asina nan yega finalmente na e Mausoleo di imam Reza. Pa e motibo aki tabata tin un retraso enorme den e schema di e ceremonia.
Un multitud enorme di hende a ocaciona un retraso den e schema di e ceremonia
Dialuna mainta tambe lo tuma lugar un ceremonia na Teheran, akinan e lidernan Irani lo ta bay ta presente. Segun e programa oficial, e lider supremo ayatollah Ali Khamenei, tambe lo ta bay ta presente. Debi na e multitud grandi di hende, a cera diferente area di e cuidad pa trafico.
E lider supremo di Iran, ayatollah Ali Khamenei tambe lo ta bay ta presente na e ceremonia na Teheran
Despues di e ceremonia na e capital di Iran, e curpa di Soleimani lo wordo hiba na Qom, e cuidad santo, cu ta keda den centro di Iran, unda un biaha mas lo organisa un ceremonia y diamars awo e conocido general lo wordo dera na su cuidad natal Kerman.
Despues di e morto di Soleimani, na varios ocasion Iran a duna di conoce cu nan lo tuma revancha pa cu e morto di e top general Soleimani. Mientras e presidente Donald Trump a avisa awe un biaha mas riba Twitter cu lo ta bay tin consecuencia pa cu esaki y cu Merca lo bay tuma accion.
