Gasparito – Diabierna anochi bario di San Miguel y Gasparito tawata bou hopi alarma y luznan di tanto polis, ambulance y brandweer.
Tawata algo prome cu mey anochi polis di Noord a wordo notifica di un accidente hopi serio den area di The Buccaneer Restaurant.
Mesora polis a bay e sitio y agentenan no por a kere kiko a topa.
Un auto Mitsubishi Lancer lo a bay pega den algun mata, pero na halto.
Den e auto nan a constata dos persona herida, ambos pega den e auto.
Mesora a pidi pa unidad di Materiaalwagen. Na nan yegada mesora nan a drenta accion y a logra libera e prome pasahero.
E segundo pasahero tawata un poco mas dificil pa saca debi cu parse elo a bay pega bou di e dashboard.
Na e sitio nos a compronde cu e auto aki tawata bayendo cu un velocidad hopi halto direccion nort ariba e caminda di San Miguel pa Gasparito, pasando e bocht ela perde control bay na su man drechi y ta manera “bula” pasa memey di dos troncon di Kwihi pa e termina pega na halto cu e “nanishi” abou.
Pues esey ta un indicacion e velocidad cu Mitsubishi tawata bin cune tawata uno sumamente halto.
Ambos herido a wordo transporta pa Hospital, nan condicion no ta conoci.
