Spaña a duna un imigrante ilegal permiso di estadia, e ilegal tabata procedente di Senegal y luna pasa ela saca un homber handicap for di un edificio cu tabata na candela.
Desde e dia aki e ilegal aki a wordo aclama un heroe na Spaña
E bendedor ambulante Gorgui Lamine Sow di 20 aña a yega Spaña na aña 2017 y tabata permanece ilegal na Spaña.
Dènia, Costa Blanca, Spaña: Luna pasa Gorgui Sow tabata canando den un caya di e cuidad Dènia, situa na Costa Blanca. Na dado momento ela scucha hopi gritamento y tabata mira hopi huma saliendo for di e bentananan ariba e prome piso di un edificio. E no a pensa dos bes y a mesora a subi bay halto via e tralienan di hero di e porta principal y asina a logra subi riba e balcon di e prome piso, un rato despues ela sali bek cu un homber handicap riba su schouder y via un trapi cu mientrastanto un bisiña a pone, ela baha cu e homber carga riba su schouder.
E gobierno municipal di Dènia, a keda hopi gradicido cu locual ela haci y mesora a entrega un peticion na gobierno Spaño pa entrega Sow un permiso di estadia. E Peticion a wordo entrega acompaña cu un lista di 90mil firma di cuidadanonan Spaño, pidiendo pa por fabor duna Sow un permiso di estadia, como cu e ta un ehempel pa e comunidad.
E Ministerio Spaño di labor y Imigracion a duna di conoce cu Sow sigur ta bay haya un permiso di estadia, como muestra di gratitud di locual ela haci pa e comunidad y tambe pa su corahe.
Sow a laga sa dilanti medianan Spaño, cu e ta bibando cu su pareha y su yiu muher di 7 luna, den un camber cu hopi mas hende na Gandia cu ta un lugar cerca costa y tur dia e mester core 40 kilometer den bus pa yega Dènia, caminda e ta pasa bende armband y cadena riba caya.
Segun Sow a sigui bisa ” Mi ta pober, pero mi ta fuerte y semper mi por yuda, mi no kier mira hende sufri. Tabata tin huma y hopi candela, pero bo no por tin miedo di esaki, paso tabata tin un hende paden y mi mester a salba e persona aki for di e candela.”
