Alto Vista, Noord: Diaranson den oranan anochi, presencia di polis a wordo pidi na un cas na Alto Vista pa un homber cu lo ta batiendo su señora formalmente. Mesora a manda polis na e sitio, dos patruya mesora a sali bay direccion di e cas.
Na yegada, pafo di cura e agentenan policial ya caba por a mira, slof, coi wanta cabey, lighter etc benta riba vloer, indicando cu enberdad lo meste tabata tin un pelea andando den e cas.
Na e sitio polis a bin compronde cu e dama lo a haya un sota formal di e homber, polis a papia cu e dama paden di e cas.
Na momento cu polis a yega na e cas, ya e homber a bandona su cas, aparentemente elo a drenta mondi bay sconde. Polis a bay busk’e den e area, pero no a logra topa cune.
Na momento cu polis tabata papiando cu e señora pa asina trata na saca afo kiko a pasa, nan a bin compronde cu e señora no kier entrega un keho oficial di maltrato. Polis a splik’e cu si e ta desea e por hacie.
E mama di homber tambe a bin papia cu polis. Ela bisa polis cu aparentemente e señora tabata tin un cuchiu skerpi den su poder. El a mustranan e cuchiu skerpi cu aparentemnte e señora tabata tin pa defende su mes contra e homber.
E mama di e homber a pidi polis pa atende seriamente cu su yiu. Prome cu polisnan a bandona e cas, nan a bisa e famia pa avisanan ora e homber yega bek, pa nan por atende cu e homber. Tanten cu e señora no kier entrega keho, polis aparentemente no por haci mucho cos y e maltrato lo sigui keda pasa.