Motor di auto a pega candela despues cu algo den e motor lo a explota

Sero Blanco, De La Sallestraat: Diaranson den oranan di mainta presencia di polis a wordo pidi na rotonde Sero Blanco pa un accident, den cual un auto tabata na candela, mesora a manda polis na e sitio.

Na yegada polisnan a topa cu un auto na candela, e chauffeur di e auto, un Suzuki Aerio, a splica polis cu e tabata biniendo di panort y manera cu e tabata acercando e rotonde, ela scucha un explosion hopi fuerte den e motor, e tabata asina fuerte cu ela lanta e hood di auto, strobando asina e bista di e chauffeur riba caminda,esaki a pone cu e chauffeur a bay dal contra e acera di e rotonde. E motor mesora a pega candela, polis a basha awa riba e auto na candela y a logra domina e candela. NO tabata tin niun hende herida.