Riba e prome dia di aña, presencia di polis a wordo pidi pa un homber cu ta obsesiona cu su ex y lo ta sufriendo pisa di amoritis.
Professor Lorentzstraat, Oranjestad: Diaranson den oranan di mainta presencia di polis a wordo pidi cu urgencia na un cas den Professor Lorentzstraat, pa un homber cu no kier acepta cu su ex no kier e mas.
Na yegada e agentenan policial a bin compronde cu e homber a persigui su ex pareha, ela blokea y a dal e auto di su ex, tambe despues di dal e auto di su ex, ela dal cu su mesun auto contra e cura di cas.
E problema no a keda te eynan, despues cu ela dal cu su auto contra e cura, ela baha razo for di e auto, a cuminsa bringa y a maltrata un homber cu tabata sinta banda di su ex.
E agresor tin yiu cu su ex pareha, pero no kier acepta y compronde cu e dama no kier e mas y mucho menos kier compronde cu tin hopi mas pisca den lama, cu e mester bay tira linea otro caminda.
Aparentemente tin dos denuncia caba haci na polis, pero e homber lo no ta worry y ta sigui molestia su ex.
Polisnan na e sitio mesora a detene e homber pa intento di asesinato, core auto bou influencia di alcohol, tambe pa maltrata un persona y menasa hende na e sitio, cu transportwagen di polis ela wordo hiba warda.