Home Politics Parlamentario Endy Croes: Gobierno ta priminti y Gobierno ta cumpli! “Minister Xiomara...

Parlamentario Endy Croes: Gobierno ta priminti y Gobierno ta cumpli! “Minister Xiomara Maduro a anuncia cu ta elimina Loonbelasting y Inkomsten Belasting pa salario bou di 2400”

SHARE

Parlamentario Endy Croes ta contento cu un otro anuncio hopi importante diabierna ultimo net promer cu aña termina. Ta den e mesun luna di december cu Minister President Evelyn Wever Croes a anuncia rebaho di coriente cu 10% pa pueblo, 9% pa Fundacion, School y Misa y 7% pa comercio cuminsando 1 di januari 2020. Minister di Asuntonan Social Glenbert Croes tambe a anuncia un noticia hopi agradabel cu e aumento di sueldo minimo cu 3% pa di dos aña consecutivo. Pues salario minimo desde 1 di januari 2020 lo bira Afl. 1815,35. Tambe Minister di Salubridad, Turismo y Deporte Dangui Oduber a anuncia cu entrante 1 di januari 2020 e pensioen di biehes pa pareha casa lo aumenta cu 42 florin pa luna y pa e pensionado soltero esaki lo aumenta cu 25 florin pa luna.

E tres anuncionan aki – basa riba decisionnan responsabel – a cay den masha bon tera y ta muestra di un gobierno cu ta traha cu su oido na curason di pueblo pa alivia dolornan cu ta biba den su pueblo.

Extra placa den cartera
Y tabata diabierna ultimo cu Minister di Finansa Xiomara Maduro durante un conferencia di prensa a anuncia un otro bon noticia. Gobierno a hisa e belastingvrije voet cu 4% pa compensa inflacion cu tabata alrededor di 4%. Cu esaki gobierno a hisa e belastingvrije voet di Afl. 27.752 (2019) pa Afl. 28.861 (2020). Kico esaki ta significa? Tur hende cu ta gana un salario di Afl. 2400 florin of menos pa luna no lo paga Loonbelasting mas ni tampoco lo paga Inkomstenbelasting. Ta elimina tanto Loonbelasting y Inkomstenbelasting pa e grupo aki. Alabes tur otro hende lo keda cu extra placa den nan saco. Pa duna un ehempel un persona cu salario di 2400 florin pa luna lo keda cu extra Afl.146 florin pa aña. Banda di 10% di rebaho di coriente cu nan ta haya cual tambe nan lo keda cu un suma extra den nan saco. Un persona cu un salario di Afl. 5490 pa luna lo keda cu Afl. 425,- extra den su saco cu e cambio aki tambe banda di e 10% di rebaho di coriente.

Reduccion di e deficit astronomico
Gobierno ta percurando di tur forma pa crea e espacio financiero necesario pa henter pueblo por sinti’e directamente den su cartera compensando asina e inflacion. Berdad tin hopi trabou pa haci ainda den e siguiente dos añanan pero aunke pa con dificil e desaster financiero cu AVP a laga atras ta, e gobierno aki a percura pa duna bek na pueblo pa asina balansa y compensa e dolor. Banda di esaki a baha e deficit di pais Aruba di 444 miyon den 5 aña pa 4 miyon florin. Pues a baha esaki cu 440 miyon!

Parlamentario Endy Croes ta felicita Minister Xiomara Maduro cu e gran anuncio di diabierna ultimo. Danki Gobierno, danki MinFec y pabien Aruba. Nos no por haci milager den dos aña pero nos ta haciendo lo suficiente pa corigi un desaster y duna pueblo bek locual e merece, Parlamentario Endy Croes ta termina bisando.