Seroe Blanco/ Paradera: Diasabra anochi pa Diadomingo mainta varios doño di auto a bira victima di destruccion y ladronicia na nan auto.
Diasabra den oranan di anochi presencia di polis a wordo pidi na Club Caiquetio, pa ladronicia y destruccion na varios auto. Mientras cu e personanan tabata disfrutando di e Festival di Dande, ladronnan a kibra glas di varios auto y comete ladronicia den e autonan.
Esaki no a keda na Club Caiquetio so, pasobra Diadomingo mainta den careda di 6’or y mey, presencia di polis a wordo pidi na Vibe & Lounge, ex Bo Wah Bar & Restaurant, na Seroe Blanco caminda desconocidonan a destrui e glas di banda di chauffeur di un pick-up preto. No ta conoci si ta trata di vandalismo of intento di ladronicia.
E caso aki a keda den man di autoridad pa mas investigacion, e club tin camara di siguridad pero e ora ey, e tabata cera y polis a keda di pasa mas despues pa mira si via e camaranan di siguridad por mira ken a comete e destruccion aki.
Un rato despues cu polis a caba di atende cu e destruccion na e auto na Vibe & Lounge, den careda di 6’or y 40 presencia di polis a wordo pidi na Paradera, na Morning Supermarket, pa un otro auto cu tambe su glas a keda destrui.
Na yegada polis a bin topa cu un Chevrolet, color cora, e biaha aki e glas na e banda di pasahero tabata destrui. No ta conoci si por ta trata di vandalismo of intento di ladronicia.
E supermarket tin camara di siguridad y despues cu polis a tuma tur datos a keda di pasa back den dia pa mira si e camaranan di siguridad a capta e imagennan na momento cu e anti social of ladron a destrui e bentana di auto.
E “modus operandi” ta mustra den direccion di e mesun sospechoso. Riba medionan social por mira cu habitantenan di Paradera ta cansa di un adicto ambulante cu ta cana rond ta horta den Paradera y becindario. No ta descarta cu ta trata di e adicto cu actualmente ta bek den libertad y a comete tur e destruccionnan aki.
E adicto aki ta conoci pa hopi persona den su bario, un mucha homber cu droga a destrosa su bida por completo, famia y amigonan a trata na yude pero e ta keda cay bek. Ban spera cu pronto haci un otro intento pa saca e adicto aki for di su bicio.