Alto Vista – Diasabra pa mas o menos 2’or di merdia a sosode un accidente hopi serio na e Splitsing di Alto Vista cu ta bay pa e Kapel.
Habitantenan a scucha un zonido basta duro y a ora a sali pafo a topa cu e accidente.
E dama tras di stuur di e Suzuki Alto a yega na e Splitsing cu e intencion di bay direccion nort pa bira pa bay links direccion di e Kapel, net na momento cu di su man robes tabata biniendo un truck di chupa pos.
E Suzuki Alto cu ta biniendo di rechts tabata tin preferencia riba e truck.
E impacto tabata hopi fuerte, e Suzuki Alto a drenta parcialmente bou di e truck.
E dama chauffeur a keda pega den e e auto y mester a warda ariba Materiaalwagen di Brandweer pa e wordo libera.
Esaki a dura mas o menos un 20 minuut, e dama tabata henter ora na tino y tabata kehando di hopi dolor.
Paramediconan tabata ariba standby pa tum’e over manera cu e personal di Brandweer a saca e dama chauffeur for di e auto.
E dama a wordo transporta cu hopi urgencia pa hospital.
No ta conoci con su situacion tawata momento cu ela wordo transporta pa Hospital.
E Suzuki Alto a keda total loss, para canto di caminda.