Riba e prome dia di Pasco un homber a haya un tas yen di placa efectivo y a entrega esaki na polis.
Krefeld Alemania: Diaranson durante cu tur hende ta den e ambiente di Pasco un homber Aleman di 51 aña a bin topa cu un tas yen di placa cash, tabata trata di mas o menos 16 mil Euro cash, ela bin topa cu e tas den e centro di cuidad di Krefeld.
E homber no a pensa niun rato di keda cu e cent y mesora ela bay entrega e tas cu e contenido na Polis. Na Alemania tin un regla cu tur hende cu haya placa of algo di balor benta abou y entrega esaki nan na polis tin derecho riba un finders fee, e finders fee ta depende di e balor di e articulo of cuanto placa a wordo haya. E homber aki tabata tin derecho riba 490 Euro, pero ela nenga di tuma e finder’s fee, pa motibo cu ta Pasco, ni pa nada a tuma su 490 Euro.
Mesora polis a cuminsa cu un investigacion y a logra topa cu e doño di e tas. E doño ta un homber di 63 aña y ela splica polis cu mirando cu ta dianan di fiesta e homber a prefera di a cana cu tur e cent riba dje paso segun su persona e placa lo ta mas sigur den su poder, cu si e lag’e na cas.
Algo casi similar a pasa ayera tambe na Aruba, caminda un paramedico a topa cu un cartera cu basta placa benta riba caminda. Ela entrega esaki y sigur esaki lo mester a wordo entrega caba na e compania cu a perde e cartera, mirando cu tabata tin nomber di e compania den e tas.
Pero den pasado na Aruba, un dama a yega di haya un tas di banco di deposito benta abou. Den dje tabata tin placa, e dama inocentemente a bay entrega esaki na polis y a hay’e den problema serio, ela wordo deteni pa interogacion. E ta masha normal cu si bo topa un cartera cu no ta di bo, bo ta entrega esaki na autoridad, pero no ta tur ora e ta bay bon, paso si un hende a pasa prome cu bo y a saca algo for di e cartera, abo cu inocentemente a bay entrega esaki na polis of na e doño ta esun cu nan lo por bay culpa di e cent cu nan falta.