Home » Parlamentario Michael Lampe Si tin placa pa promocion sin sentido mester tin pa indexering

Parlamentario Michael Lampe Si tin placa pa promocion sin sentido mester tin pa indexering

by Admin
0 comment 61 views

Den presupuesto supletorio 2019 cu a wordo trata diabierna ultimo den Parlamento, a bin Sali na cla cu ex Minister di Infrastructura a pidi y haya e suma di 25 mil florin pa e usa pa promocion di servicio di Serlimar.
Algo cu ta absurdo sigur na momento di tuma na consideracion cu gabinete Wever Croes a priminti gobierno di Reino, cu e lo reduci su gastonan di maneho formalmente y simplemente no por tin hustificacion pa e kwart miyon aki.
Parlamentario Michael Lampe di fraccion di AVP ta mustra cu tambe un suma di 400 miyon florin adicional a wordo aproba riba peticio di Prome Minister pa paga salarionan di trahadonan di gobierno, sin cu tin splicacion di e situacion aki a presenta y dor di kico e gasto aki a bin acerca cu no tabata presupuesta.
“Ta hopi cosnan straño ta tumando luga caminda gabinete Wever Croes ta mustrando bon cla cu tin placa pa tur hende rond di nan gobierno pero placa pa cubri indexering di trahadonan di gobierno, no tin ningun debchi.
Un indexeringa cu a lanta cabes despues di un avalancha di medida introduci pa e gobierno MEPPORRED, cu a priminti pueblo cu nunca nan lo tuma medida pero a bira traciona nan propio promesanan haci na pueblo.
Ora cu nos analisa cierto desaroyonan financiero cu a tuma luga bou di e gobierno di Prome Minister Evelyn Wever Croes, por mira cu e suma di 250 miyon florin pa promocion di Serlimar merece un splicacion pero mas tanto un hustificacion cu practicamente ta inexplicabel den e periodo aki.
Tin famianan cu problema financiero serio, trahadonan y henter comunidad ta luchando contra un di e pio inflacionnan cu nos pais a yega di conoce y aki ta surgi un Minister cu ta pidi “doodleuk” un suma di 250 mil florin y pa colmo ta haya aprobacion pa esaki tambe.
Tur e placa aki pa hiba un campaña politico ya cu nos no por mira esaki di otro forma, pa promove un compania di gobierno cu tur hende sa caba di su servicio pero tabata placa pa influencia opinion di comunidad contra di un otro compania priva cu tambe ta duna mesun servicio.
No solamente esey ta un falta di seriedad y respet pa cu pueblo, pero ta mesun Minister aki den su prome lunanan den e gobierno aki, a otorga un contract di huur pa un di su sponsornan pa un edificio cu e gobierno anterior a termina uso di e luga aki.
Pues placa tin pa e tipo di barbaridadnan aki pero na momento cu sindicatonan sinta na mesa y papia di inflacion, nan ta wordo humiya dor di Minister di Finansa cu a hiba tur informacion salarial na atencion di comunidad.
Prome Minister tambe ta pidi y haya aprobacion di 400 mil florin, pues casi mey miyon florin, pa cubri salario di trahadonan di Serlimar y aki pueblo ta puntra di kico a haci cu e placa cu a ranca di pueblo den ultimo dos añanan y di con atrobe mester placa pa Serlimar?
Y kico e tres fraccionnan cu ta sostene gobierno ta haci, simplemente keda keto keto, algo increibel y di condena totalmente.
Placa adicional cu a surgi for di sacrificio di henter nos pueblo pero cu ningun hende sa con esaki ta wordo gasta ya cu keto bay tin fiesta ta sigui di e gobierno aki, gastonan di personal ta sigui subi segun entre otro rapportnan di CFT, simplemente no tin seriedad di gobernacion di nos pais.
Tres fraccion cu mayoria minimo a dicidi di aproba otro pakete di medida cu lo drenta na vigor dia prome di Januari 2020, cu lo bolbe crea mas problema pa economia di e pais, pa nos pueblo cu lo sigui perde mas riba su poder di compra.
Lamentablemente pueblo ta consciente cu mientras e ta sufri, famia y amigonan ta sigui mira nan entradanan subi dor di e maneho di friends and family di gabinete Wever Croes.
Ta na su luga bou di e circunstancianan cu tin y e mentalidad di e gobierno actual, pa gobierno honra e exigencianan di sindicatonan di trahadonan publico pa loke ta pago di indexering,” Parlamentario Michael Lampe a trece dilanti.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio