Home » GASTONAN TA SIGUI SUBI DEN PRESUPUESTO SUPLETORIO 2019

GASTONAN TA SIGUI SUBI DEN PRESUPUESTO SUPLETORIO 2019

by Admin
0 comment 59 views

Parlamento di Aruba a ricibi e ley di presupuesto supletorio 2019 y den menos cu 24 ora miembronan di Parlamento a haña oportunidad pa hasi preguntanan por escrito, ricibi e contestanan y trata e proyecto di ley. Un presupuesto supletorio supuestamente neutral, sinembargo esaki no ta nifica cu no tabata tin gastonan cu no tabata presupuesto inicialmente.

“E deficit cu a ser presenta mester ta 14 miyon di florin mas hopi, si sigui e palabracionan hasi den e protocol di 2018. Mientras cu e presupuesto ta parce di a cumpli cu e normanan, Gobierno a opta deliberadamente pa pone e palabracionan hasi cu Hulanda un banda, como tambe consehonan di e CAFT y Raad van Advies,” segun Parlamentario Richard Arends (AVP) na final di e reunion.

“Compara cu aña pasa e gastonan a subi un biaha mas cu 14 miyon di florin, despues di a subi caba cu 100 miyon na 2018 y 30 mio na cuminsamento di 2019. Entradanan pa e aña aki tabata 100 miyon mas cu aña pasa door di diferente medidanan cu a wordo introduci riba lomba di pueblo y comercio,” Parlamentario Arends a splika den un analisis cortico.

Mei-mei di aña Gobierno a presenta su reporte di entrada y gastonan y algun siman atras e nota di fin di aña, of najaarsnota. “Niun di e informenan aki ta cuadra cu e presupuesto supletorio a wordo trata,” segun Arends cuestionando e informacion suministra. “Den e ultimo siman aki Gobierno a pidi Parlamento su gevoelens den tres ocasion pa aumento di gasto di e aparato gubernamental, e.o. pa Serlimar, sin duna un splicacion detaya riba e contenido. Riba dje a entrega un Nota di Cambio durante reunion cambiando e cuadro financiero un biaha mas”.

Gobierno un biaha mas no a duna oido na e recomendacionan di CAFT cu a conseha pa identifica su gasto y entradanan incidental for di esnan structural. “Pa loke ta spera nos otro aña, tambe Gobierno no a duna ningun informacion: pueblo lo sera aña atrobe den un incertidumbre. No ta conoci ki dia e siguiente fase di e reforma fiscal lo drenta na vigor y ni kico lo ta e embergadura di e medidadnan aki. Prome Minister a hasi palabracionan na Hulanda y Parlamento ta keda un biaha mas sin sa kico e consecuencianan ta. Loke a sali den medionan di prensa te awor ta un aumento di deviezenprovisie cu 20% cu lo tin consecuencianan grandi pa poder di compra y tambe e peso di hasi negoshi,” Sr. Arends a bisa.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio