ORANJESTAD, Aruba: Dia 6 di Januari 2020 lo inicia e campeonato di futbol Copa Betico cu Arubaanse Voetbal Bond (AVB) lo host. Un total di 16 team lo competi contra otro buscando pa bira e campeon di Copa Betico 2020. A tene un evento di trekmento di lot y e teamnan tabata ansioso pa sa contra ken nan lo hunga.
E evento a bay bon manera cu a pidi e teamnan pa yega na ora, di cual mayoria tabata presente, pa por a trek lot, asina Harvey Clement, competitie manager di AVB, a indica. Manera ta custumbra AVB ta organisa Copa Betico y e ta cuminsa e prome siman di Januari. A invita e teamnan, kendenan a yega pa mira nan nomber como team y saca nan number p’e preparacion di e campeonato. Asina el a bay te ora cu e schedule a keda cla cu e prome weganan. E weganan lo inicia dia 6 di Januari 2020.
AVB ta innovando futbol di Aruba. Ta convenci cu 2020 lo bay bira un aña hopi grandi. AVB kier p’e fanaticonan yega stadion y apoya nan team, pero tambe duna sosten na e muchanan. Por mira cu hopi di e teamnan tin muchanan hoben y pa duna nan sosten, pero tambe prepara loke ta bay bira e sigiuente fase den campeonato. E prome rond di Copa Betico 2020 lo inicia den e 2 stadionnan, esta Frans Figaroa y Guillermo Trinidad. Despues e fase di kwart final, semi final y final lo haci uzo unicamente di stadion Guillermo Trinidad.
AVB ta invita tur amante di bon futbol, fanaticonan di cada team pa bin presencia nan team durante Copa Betico 2020. Un biaha mas e lo bay ta grandi. Tambe AVB ta desea cada un di nan feliz dianan di fiesta.