Un investigashon na 2004-2005 bou di guia di un sientífiko di e Akademia di Siensia di California (California Academy of Science) a traha riba un katalòg di e espesienan di ‘arachnida’ (manera araña i skorpion) na Aruba, Boneiru i Kòrsou. Esaki ta e promé estudio den su kategoria den mas ku 100 aña. Den Caribbean Journal of Science a publiká e resultadonan ku ta revelá 25 espesie nobo, ku no tabata deskribí ainda pa e islanan i tambe 20 espesie nobo pa siensia. Komprenshon di e poblashon di ‘arachnida’ ta importante komo ku nan ta representá un parti vital di e ekosistema i ta krusial pa mantené e balansa dor di nan kontrol di e poblashon di insekto.
‘Arachnida’ ta hunga un papel importante den e ekosistema di e islanan ABC. Maske ku hopi biaha ta konsiderá nan komo un pèst, e espesienan akí ta krusial den kontrol di poblashon di insekto. Sabiendo kon importante e bestianan akí ta, ta sorprendé hende ku ta un solo biaha a dokumentá e espesienan akí den un investigashon na e islanan ABC, na 1887 (Van Hasselt, 1887). For di e tempu akí, maske ku tabatin artíkulo skirbí di espesienan spesífiko, no tabatin ningun investigashon ni inventario ku ta deskribí e poblashon di ‘arachnida’.
E estudio
Pa por a yega na un investigashon al dia kompará ku esun di 1887, un grupo di investigadó a hasi kolekshon di ‘arachnida’ den kurso di 3 luna (novèmber 2004 – yanüari 2005) na Boneiru i Kòrsou. Na Aruba e kolekshon di ‘arachnida’ a tuma lugá durante 2 dia na òktober 2004. A hasi kolekshon di material na un variedat di sitio inkluso áreanan urbano komo área di mondi. Meta di e estudio tabata pa kolektá material na un variedat di habitat di manera ku ta yega na un representashon di e sortonan presente na e islanan (Crews et al., 2019).
E resultadonan
Finalmente a rekohé i identifiká mas ku 750 ehemplar, representando miembronan di e famianan di ‘arachnida’: Skorpion, Amblypygi (araña ku suip i skorpion sin rabu), Pseudo skorpion, i Araña. Di esakinan, tabatin 1 espesie di skorpion, 1 espesie di ‘amblypygid’ (skorpion ku suip i sin rabu), 2 espesie di pseudo skorpion i 76 espesie di araña. Ademas, di e espesienan akí, 25 no tabata konosí ainda ku nan tabata presente riba e islanan akí i 20 espesie tabata nobo pa siensia.
Kontrario na Boneiru ku Kòrsou ku ta separá di tera firme di Sùit Amérika pa medio di un kanal oseániko hundu, Aruba ta konektá ku kontinente di Sùit Amérika. Di manera, ku espesienan di mata i animal riba e isla por tin konekshon direkto ku nan famianan suramerikano anto ta asumí ku Aruba tabata konektá ku kontinente durante e último bahada di nivel di laman 19.9 mil aña pasá (Stienstra, 1991). Maske ku ta difísil pa bisa komo ku a kolektá espesie solamente durante 2 dia, e investigashon akí no a haña hopi indikashon ku esakinan ta mustra meskos (konvergensia) ku e espesienan di Kòrsou i Boneiru. Ademas sientífikonan a identifiká dos espesie ku nunka anterior a deskribí. Ta posibel, ku si tabatin mas tempu pa a kolektá material, lo por a haña mas espesie pa dokumentá loke por a hisa e indikashon di konvergensia ku e otro dos islanan.
Riba tur tres isla, a kolektá mas material den áreanan di mondi ku den áreanan urbano. Na Kòrsou a dokumentá mas tantu espesie, loke por ta resultado di un periodo di kolekshon mas largu i for di mas variashon di sitio. En general e espektativa ta ku Kòrsou lo tin un ekosistema mas diverso komo ku e isla tin mas variashon di sorto di vegetashon i espesie di mata (De Freitas et al., 2005) huntu ku mas tantu diferensia den elevashon físiko, mas tantu kaida di áwaseru pa aña i ménos degradashon di habitat ku na Boneiru.
Konekshon ku Komersio di Katibu
E stashon di investigashon biológiko CARMABI na Kòrsou a logra kapturá un araña ‘gnaphosidae
Australoechemus celer’ (araña di tera), un espesie ku anteriormente tabata konosí di ta biba na e islanan di Cabo Verde. E orígen di e espesie akí no ta kla. Por ta ku e araña akí ta representá un poblashon nativo ku lo por a introdusí hopi tempu pasá, tempu ku tabata stashoná katibu na Cabo Verde promé ku tabata transportá nan ku barku pa Kòrsou. Òf di e ruta di otro banda: introdusí na e islanan di Cabo Verde for di Kòrsou/Sùit Amérika (Brokken, 2015).
‘Arachnida’ ta hunga un papel importante den e medioambiente i e promé stap pa sigurá nan futuro ta komprendé bon kua espesie ta presente riba kada isla. E estudio akí ta representá un inisio importante pa trese e database di ‘arachnida’ al dia, sin embargo, mas investigashon ta nesesario pa por deskribí kompletamente e ‘arachnidanan’ ku ta haña riba kada un di e islanan. Ta eksitante pa pensa ki espesienan nobo lo por topa kuné, òf kua konekshon ku e otro islanan lo por krea si tene kuenta ku historia riku di kada isla.
Reportá loke bo ta mira:
Bo a mira ‘Arachnida’ (manera araña i skorpion)?
Por fabor mèldu loke bo a mira riba e wèpsait DutchCaribbean.Observation.org
Òf baha e grátis app
E grátis wèpsait akí i grátis app no ta solamente pa biólogo usa pero tambe pa tur siudadano por reportá kualke animal i mata i e ta disponibel den mas ku 40 idioma. Esun na papiamentu ta den proseso di tradukshon aktualmente. Reportahe tokante espesie ku ta bini di e komunidatnan lokal ta hopi balioso pa organisashonnan di konservashon di naturalesa pa siña konosé i protehá e espesienan riba nos islanan. Pa mas informashon tuma kontakto ku [email protected]
Pa mas informashon tokante ‘Arachnida’:
Tuma kontakto ku Sarah Crews na [email protected]
Twitter:@sarahnopidae
Instagram:@cas_arachnerds
website:sarahnopidae.com
Fuente: Centruroides testaceus by M. Oversteegen and C. de Haseth