Home » Parlamentario Mike de Meza Medida y ningun plan economico di gobierno causando pobresa y desaster

Parlamentario Mike de Meza Medida y ningun plan economico di gobierno causando pobresa y desaster

by Admin
0 comment 40 views

 

 

E situacion economico di pais Aruba ta pasando den su peor momento den ultimo 10 añanan caminda den forma bon cla, sector priva y comercial, a manda e mensahe directo pa gabinete Wever Croes, cu  ‘cost of doing business’ ta birando dia pa dia mas dificil.

Miembro di fraccion di AVP, sr Mike de Meza a mustra cu e alertanan serio aki, ta biniendo for di diferente grupo den comunidad, no solamente di e sector petrolero, pero tambe di otro instancianan caminda entre otro Camara di Comercio hunto cu otronan, a bati alarma atrobe.

“Nos tin un situacion economico na Aruba, caminda por papia di un crisis serio, sigur ora cu tuma nota cu gabinete Wever Croes, no tin ningun plan economico ni pa corto plaso y tampoco pa largo plaso, caminda por tin speransa cu cosnan lo drecha dentro di poco.

For di prome lunanan di gabinete Wever Croes tabata bisto cu Aruba a haya un gobierno cu no tabatin nocion di kico e tin cu haci, con e tin cu atende cu interes di pueblo y interes di henter e pais caminda diferente proyecto cu gobierno di AVP a inicia, cual proyectonan lo mester a duna un aporta concreto  na un economia mas stabiel pa e pais, a wordo boicotia den un forma increibel.

Prome Minister Evelyn Wever Croes ya na luna di april 2018 a pidi oficina di abogado di su tata,  pa busca un forma pa kibra e contract di refineria cu CITGO, sin busca un forma pa sigui cu e proyecto aki, cu lo a yuda economia y e situacion financiero di gobierno den un forma grandi.

No solamente esey pero apesar di a pidi abogadonan pa busca un forma pa kibra e contract, e prome mandatario tabata bin dilanti y pretende cu su gobierno tin entre 25 pa 30 compania interesa den e refineria pero dos aña despues, no tin nada a wordo haci y na mes momento e situacion economico ta sigui wordo afecta pa medida y mas medida.

No solamente a trata di kibra e contract cu CITGO pero Prome Minister kende ta encarga cu e refineria, no a busca ningun solucion, no  tabata interesa pa reuni cu e companianan envolvi y simplemente a haci net nada pa trata di sigui cu e proyecto aki cu lo a nifica hopi pa eonomia di e pais.

Representantnan di e compania aki a bin Aruba na varios ocasion, a busca pa sinta na mesa cu Prome Minister pero su persona no tabatin tempo pa atende c’un proyecto asina grandi y pa completa obra, el a manda algun hende representa su persona cu no tin conocemento di e materia aki.

Ultimo tempo mesun caso cu Repsol caminda Prome Minister ta bin dilanti y participa cu e proceso di boramento pa petroleo of gas den awa teritorial di Aruba, a termina pero ningun caminda por a ripara cu Evelyn a haci un intento pa sigui cu e proceso aki.

Ultimo testnan cu a wordo haci tabata duna indicacion positivo riba henter e proceso pero e unico intervencion real cu Prome Minister a haci, ta ora cu dos siman pasa el a bin dilanti y anuncia cu e proceso aki no ta sigui mas.

Fuera di esey den e proceso aki tambe el  a dicidi di nombra algun hende como consehero cu no tin e abilidad y ni experencia pa atende cu e cosnan aki den un forma adecuado cu lo por a percura pa un resultado mucho mas miho.

Sinembargo esaki no tabata e caso y asina dos proyecto petrolero cu por a nifica masha hopi mes pa economia di nos pais, ta bay perdi pa e simpel incapacidad di Prome Minister y su gobierno.

Recientemente TNO a anuncia cu nan ta bandonando Aruba, cu nan no tin mesun relacion cu gabinete Wever Croes compara cu gobierno di AVP cu si a mira e beneficionan grandi cu nos isla lo tin cu presencia di TNO aki.

Kico nos ta mira cu TNO a dicidi di bay establece su mes na e isla di Corsou cu si ta mira y reconoce e beneficionan c’un instancia asina por trece pa nan isla.

Otro eror grandi cometi pa gabinete Wever Croes ta di para e proyecto di algen cu mester a bin riba tereno di e refineria, cu ta un proyecto masha importante den maneho di energia limpi pero kico por mira awor, cu  Corsou si ta interesa pa sigui cu e proyecto aki y lo bay saca beneficionan grandi for di esaki.

Tur esaki pa motibo cu Aruba bin un gobierno incapacita, un gobierno cu no tin vision economico ni financiero y simplemente ta traha pa beneficio di amigo y famianan,” Parlamentario Mike de Meza a declara.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio