Parlamentario Michael Lampe Parlamento a bira cas di gobierno pa haci y deshaci ora ta necesario

Tin preocupacion grandi pa e forma con Parlamento di Aruba ta funcionando pero tambe pa e forma con Gobierno ta mal usando e fraccionnan den parlamento cu ta sostene e coalicion actual.
Michael Lampe miembro di fraccion di AVP ta mustra cu ta gobierno ta dicidi kico ta pasa, ki ora tin reunion y con tur cos tin cu cana pa e tres fraccionnan cu ta sostene e gobierno y esaki ta bisto atrobe den ultimo dianan.
“Den e tres fraccionnan aki cu ta sostene gabinete Wever Croes, tin politiconan nobo cu a priminti cambionan grandi su supuestamente ora cu nan a huramento, poniendo enfasis riba un miho control di gobierno pa asina sirbi interes di pueblo mas cu tur cos.
Dos aña despues nos por mira un desaroyo tristo, caminda ya pueblo no ta sigur si su interes general ta wordo bon sirbi den Parlamento ya cu ta gobierno mes ta dicidi kico ta pasa y ki ora cosnan a pasa.
Practicamente ta gobierno ta dicidi con e 11 miembronan cu a keda den e tres coalicionnan con nan tin cu vota, kico nan tin cu haci y consecuencia di esaki ta cu pueblo no tin proteccion contra di un gobierno cu ta bayendo den historia di nos pais, como e gobierno cu mas a ranca placa for di cartera di pueblo.
Un gobierno cu a priminti pueblo solucionnan sin medida pero ta kibrando record di medidanan cu el a tuma y ta sigui tuma, sembrando probresa den mayoria cas rond Aruba, sin tene consideracion cu pueblo ya no por soporta mas carga di loke ya el a wordo confronta cune.
Pa mustra con ta gobierno ta dicidi ta bon pa mustra c’un dia prome cu Parlamento bay cu reces di fin di aña, gobierno ta core manda e presupuesto supletorio 2019 pa wordo trata ainda den un of dos dia, ya cu tempo a cuminsa preta pa gabinete Wever Croes.
Un asunto asina serio caminda ministernan mester bin splica Parlamento cierto cambionan cu nan a haci, manera entre otro pone placa extra pa presupueto di Serlimar y otro cambionan similar cu ya a tuma luga, sin cu gobierno a haya aprobacion di Parlamento.
Tin cantidad di manipulacion ta tumando luga den e maneho financiero di gabinete Wever Croes caminda claramente e gobierno no ta kibra cabes kico Parlamento ta di opinion of tin cu dicidi y a cu ta gobierno ta defini e actuacion di e tres fraccionan aki den parlamento.
Aki ta trata di parlamentarionan cu a grita cu nan lo ta bay ta diferente, acusando otronan di pasado di no a controla gobierno pero e forma con e tres fraccionnan aki ta wordo manipula, ta wordo guia y ta wordo dirigi, ta muestra di incapacidad di e tres fraccionnan.
Tur cos ta mustra cu boluntariamente nan ta permiti esaki tuma luga ya cu e funcion como parlamentario, ta mas beneficioso pa nan cu otro cos y ta acepta e manipulacion di gobierno di e forma tristo cu esaki ta tumando luga,
Ta algo hopi serio cu Parlamento ta haya menios cu 24 ora pa studia presupuesto supletorio, ta wordo presiona pa manda pregunta pa Gobierno den un lapso di tempo ridiculo cu normalmente gobierno aki no ta contesta mes, pa despues na final di cuenta e tres fraccionnan aproba e presupuesto supletorio aki riba ordo di gobierno.
Nos ta lamenta e forma di procede aki, ya cu no solamente e ta un falta di respet pa Parlamento pero pa di tantisimo bes lo scucha e fraccionnan cu ta sostene gobierno, trata di controla maneho di e gobierno anterior na luga di controla maneho di nan gobierno,” Parlamentario Michael Lampe a declara.