Diabierna nos a atende e presupuesto supletorio pa locual ta trata aña 2019. Na 2018 ora cu nos a drenta parlamento nos a haya nos ta aproba 132.4 miyon florin di deficit den un presupuesto supletorio di 2017 p’asina por cumpli cu tur e extra gastonan haci door di Mike Eman y AVP y unda cu pa 2017 lo mester tabatin solamente un deficit di 25 miyon. Na 2018 no tabatin un presupuesto cla manera ley ta indica cu mester a ser entrega dia 1 di septemeber 2017. Ora nos a drenta nos a topa cu un deficit di 275 miyon florin. E reto di mas grandi tabata pa reduci esaki unda cu Hulanda a exigi p’esaki por ta mescos cu e aña anterior y cu ta den careda di 130 miyon, mientras cu segun protocol firma door di gobierno di AVP mester papia di un surplus di 25 miyon florin.
Presupuesto supletorio 2018
Pa loke ta trata presupuesto supletorio 2018 tabata e prome presupuesto di Aruba cu a ser aproba como Budget neutral. Pues gobierno no a gasta mas di locual el a presupuesta y mas bunita tabata cu e deficit financiero tabata di 45.2 miyon y compara cu e aña anterior unda esaki tabata 132.4 miyon. Cu esaki a mustra Hulanda cu nos ta riba bon caminda pa por tin un presupuesto duradero pero sigur sostenibel.
Presupuesto supletorio 2019
Un biaha mas a ser demostra cu Gobierno ta cumpli cu e normanan stipula unda cu pa 2019 nos mester tabatin solamente un deficit di 25 miyon, pero nos a ser sorpresa cu Gobierno a logra cera aña cu un deficit financiero di 4 miyon florin na lugar di 25 miyon. Esaki ta muestra un biaha mas di e manera di traha, mescos cu ta e caso di tur aña den luna di augustus caminda gobierno tin di bin duna cuenta na parlamento. Echo ta cu pa di dos aña consecutivo esaki ta keda den normanan stipula y sigur den cuadro di locual parlamento a aproba.
Cambio drastico di maneho financiero
Pueblo por wak un diferencia grandi den maneho financiero di Gabinete Evelyn Wever Croes, unda cu si nos bay bek na 2014 – e tempo cu Aruba a haya un KB cu Mike Eman a bay yora bao palo y bebe Ensure – e deficit financiero tabata core den 444 miyon florin y awe den dos aña di gobernacion esaki a ser reduci te na 4 miyon florin cu ta casi un balanced budget. Esaki ta danki na un maneho financiero basa riba disciplina y no riba populismo. Ta scrutina prome cu duna y sigur asina mes a sa di logra cu menos placa y cu rosea cayente di Hulanda tras di nos nek. Asina mes pueblo a conoce helicopter, busnan nobo, radarnan nobo, botonan nobo di kustwacht y asina por sigui menciona e cantidad di proyectonan cu a ser logra.
Un pabien na Gabinete Evelyn Wever Croes den su totalidad, Sigur esaki ta danki na e cambio di gobierno y tambe e rol cu parlamento a bin ta hunga den esaki, esta di percura pa controla y exigi di gobierno pa keda den cuadro financiero y cual ta logrando su metanan. Nos no t’ey ainda pero cu poder di Dios nos lo logra stabilisa nos finansas.
