Parlamentario Endy Croes a tuma nota di e musico Michael Lampe kende ta purbando pa bira un politico tratando na impresiona den un entrevista dilanti Parlamento. Segun Michael Lampe, el a divulga cu Parlamento a yama un CC, esta un reunion di Comision Central pa duna extra budget na Serlimar. Parlamentario Endy Croes a sigui splica cu Michael Lampe durante su entrevista dado momento a duna e impresion cu ta un Calypso e ta componiendo. Claramente ta demostra cu Michael Lampe no ta ‘blijf bij de les’ y no ta compronde un pataca di su trabou. No solamente esaki, pero ta demostra alabes cu e NO ta LESA SU DOCUMENTONAN y ta purba tira para. Tin hende ta gusta politica pero politica no ta pa nan. Imposibel e barbaridad cu Michael Lampe a papia dilanti camara. Demas Parlamentarionan te hasta di su propio partido mester a hari’e.
Gobierno no a pidi extra placa
Michael Lampe a sali cu un storia (sprookje) cu Parlamento a core yama un reunion di Comision Central pa aproba un extra budget di 3.2 miyon pa un minister, sin cuestiona e contenido di esaki y alabes ta drenta Parlamento pa duna extra budget na Serlimar. Parlamentario Endy Croes ta reta Michael Lampe pa no papia so pero demostra cu documento. Claramente e no por haci esaki pasobra esaki No ta berdad. Ningun pero ningun momento gobierno a pidi Parlamento extra placa manera si tabata e caso durante 8 aña di su idolo Mike Eman. Pues na 2018 gobierno a logra cera aña cu un presupuesto Budget Neutral y na 2019 esaki lo ta igual esta un presupuesto Budget Neutral. Kico esaki kiermen? Lo no pidi Parlamento extra placa! Solamente durante tratamento di e suppletoire begroting lo haci cambio di algun post pa otro post den cuadro di e presupuesto aproba.
Unda Michael Lampe tabata tur tempo?
Mike Eman y AVP a presta 2200 miyon den 8 aña, a paga coordinadornan 142 miyon, a causa un desaster financiero y ta e unico creador di e Mega Debe. Mike Eman tur aña a bin Parlamento pa pidi aprobacion pa extra placa y miyones cu ya el a gasta surpasando locual mesun Parlamento di AVP tabata aproba pe y tur tabata grita VOOR den coro. Unda Michael Lampe tabata ta tur e tempo?
Parlamentario Endy Croes ta termina splicando cu Michael Lampe nunca ta na trabou y ora tin reunion publico so e ta core yega mayoria biaha hopi laat tur na mekke mekke a consecuencia di su di dos trabou como musico trahando tur dia te laat den marduga. Nos ta respeta su trabou como musico unda e ta den su comfort zone. Alabes ta comprendibel cu Michael Lampe no ta compronde ni domina politica. Terminando, Croes ta desmenti totalmente cu ningun pero ningun momento gobierno a pidi aprobacion pa extra budget di 3.2 miyon manera Michael Lampe ta insinua.