Home Politics Michael Lampe (AVP): “Mi ta haya rason y ta keda confirma Parlamento...

Michael Lampe (AVP): “Mi ta haya rason y ta keda confirma Parlamento ta fo’i control”

SHARE

Diabierna mainta a yama un reunion den Parlamento na ultimo ora y practicamente sin contenido. Parlamentario Michael Lampe den su conferencia di prensa un dia anterior a menciona cu Parlamento ta for di control. E manera con gobierno ta tratando cu Parlamento absolutamente no ta na su luga.

Segun parlamentario Lampe, for di comienso cu a institui e Parlamento aki, a vocifera cu tin un grupo di Parlamentario cu e intencion di hiba un politica diferente, representando un politica nobo, di un era nobo riba nos Pais.

Lampe ta bisa cu e por a tuma nota cu netamente e politiconan hoben, cu a sali ta bati riba pecho, hunga teatro, haci diferente show den Parlamento, vociferando di lo bay controla Gobierno, awe ta esnan cu no ta haci ni un solo pregunta ni por escrito riba e presupuesto supletorio na e Gobierno aki.

Den un reunion publico yama di relampago riba presupuesto supletorio, tabata sorprendente cu net e Parlamentarionan aki no tabata tin mag di papia mucho menos haci ningun pregunta na nan Gobierno riba locual nan ta haciendo cu placa di pueblo.

Den opinion di parlamentario Lampe, e ta mustra claramente cu tin un stempel Parlament, un palabra uza na hopi ocasion den pasado “ Ja Knikkers “ instrui door di nan Gobierno y/o Prome Minister cu ta duna opdracht cu nan no tin nada di bisa/puntra y ta asina e reunion tin cu bay.
Awe por a constata y ta netamente locual a pasa. No tabata tin ningun pregunta di e parlamentarionan cu ta dunando aporte na e Gobierno actual, cu ta nan trabou cu nan tin cu haci debidamente cuestionando e maneho di e Gobierno. Como representante di pueblo den Parlamento ta nan tarea di haci tal, mientras ta papia di politica nobo y di nivel.

Remarcabel ta cu locual ta pasando den Parlamento ta un otro sla pa democracia di pais Aruba, un otro sla pa nos comunidad cu ya ta sufriendo caba cu tanto medida tras di medida cu a implementa riba nan lomba, y awo den luna di december un otro sla na caminda unda por mira claramente cu Gobierno ta manda riba Parlamento / Parlamentarionan cu ta duna nan sosten na e coalicion y ta demostra esaki publicamente.

Segun Michael Lampe ta menciona, e famoso palabra “ Marioneta” di Gobierno cu no tin nada di bisa bou instruccion di no haci ningun pregunta riba maneho di Gobierno ta resultado di e reunion di awe. Un situacion tristo/bergonsoso pa wak pero importante pa tene e pueblo informa di kico ta tumando luga den Parlamento. Algo cu su persona a menciona den conferencia un dia prome y cu awe ta haya rason riba e hecho cu no tin control di parti parlamentarionan y cu por aprecia con Parlamento ta keda uza dor di e Gobierno pa por pusha, haci y deshaci riba locual cu nan kier.