Home Local Dienst Publieke Scholen ta celebra 10 aña di existencia

Dienst Publieke Scholen ta celebra 10 aña di existencia

SHARE

ORANJESTAD – Dia 1 di juni 2019, Dienst Publieke Scholen/ Servicio di Scolnan Publico, DPS, a cumpli 10 aña di existencia.
E Servicio aki ta atende cu e maneho di scolnan di gobierno/publico. Un total di 26 scol ta resorta bou di DPS. Entre otro: 5 kleuterschool, 7 scol basico, 3 mavo, 1 havo, 1 mbo, 1 hbo, 2 scol special y 2 scol special avansa.
Un cantidad grandi di alumno ta sigui enseñansa na scolnan publico na Aruba.
Maestro y personal di sosten den enseñansa ta ricibi y atende e hobennan aki cu hopi amor durante un aña escolar.
Segun director interino na oficina di DPS, drs. Nora Eleonora, curason di Aruba ta bati den scolnan publico. E scolnan publico ta duna un refleho real di locual ta biba den nos comunidad.
Aki tin hobennan local y imigrante tanto legal como sin documento, hobennan sabi y esnan cu mester mas atencion y guia pa siña, hobennan di tur clase social, descendencia y religion.
Nos maestronan ta ricibi tur hoben cu amor y cariño sin haci distincion. E maestronan ta pone tur empeño pa saca lo miho for di cada alumno; ta inspira y forma cada un pa bira un ciudadano util pa nos pais,
pasobra cerca nos di berdad e mucha/hoben ta central. Asina e director interino di DPS, drs. Nora Eleonora a declara.

Den e aña escolar di celebracion aki DPS tin diferente actividad planea. Den e actividadnan ta duna atencion special na tanto alumno, maestro y otro personal como tambe mayornan.
DPS ta ranca sali den luna di januari 2020 cu e prome actividad. Esey ta un concurso bou di alumnonan combina cu nan mayornan, maestronan y personal di sosten den enseñansa pa haya un slogan ( lema) adecua pa DPS.