Home Police Atrobe placa criminal intercepta na Airport

Atrobe placa criminal intercepta na Airport

SHARE

 

Ayera 18 di december recherchenan di Afpakteam a detene un homber Arubiano di 19 aña di edad na airport riba sospecho di labamento di placa.

E sospechoso a bin di Merca y tabatin un total di $ 13.213,– cerca dje. Aunke ta su deber, e no a meld e placa aki na Aduana. A par’e durante control di Aduana. Como cu e tabata contradeci su mes den su contestanan na Aduana, a dicidi pa tuma contacto cu Afpakteam. Recherchenan di Afpakteam a procede cu detenele riba sospecho di labamento di placa.

Investigacion di Afpakteam a mustra cu e sospechoso no por a splica di unda e placa tabata bin y despues el a tuma distancia tambe di e placa.

E placa lo bay den e fondo di Criminalidad (Criminaliteitsbestrijdingsfonds). Placa di e fondo ta wordo usa pa bringa criminalidad na Aruba. Afpakteam di Aruba kier aporta visiblemente na e fondo aki.

Afpakteam ta un ekipo di cooperacion entre Ministerio Publico, Cuerpo Policial di Aruba, Cuerpo di Aduana di Aruba, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Koninklijke Marechaussee (KMar), Kustwacht Steunpunt Aruba, Meldpunt (Meldpunt Ongebruikelijke Transacties) y RST. E trabao ta dirigi riba combati criminalidad financiero economico. Crimen no por paga!
Afpakteam ta trahando desde prome di maart 2017. Por acerca e team cu informacion tocante señalnan di posible labamento di placa via: afpakteam@kparuba.com of via tiplijn 11141.