Diaranson anochi, despues di un debate largo den congreso, Trump a keda ‘impeached’. Donald Trump ta bira e di tres presidente Mericano pa wordo ‘impeached’. Esaki ta un concepto legal unda cu un presidente lo mester bay enfrenta huicio politico den senado. E senado Mericano lo mester bay cuminsa un caso huridico contra nan presidente.
Aki nan mester dicta si nan ta bay condena Trump (p.e. pa corupcion), si suficiente miembro di senado vota pa esaki (67% di e total) Donald Trump lo perde su puesto. E lo mester baha for di su puesto como presidente. Trump lo wordo reemplasa cu Mike Pence, e actual vice-presidente.
Motibo pakico e proceso pa ‘impeachment’ a cuminsa ta paso Trump a keda acusa di a busca ayudo for di Ucrania pa asina beneficia su mesun campaña politico. E a presiona e pais Europeo pa asina busca informacion riba su oponente politico, candidato presidencial Joe Biden (democrata) y su yiu Hunter Biden. Trump a presiona Ucrania door di bisa cu nan lo no haya 400 miyon dollar di ayudo militar.
Banda di esaki, Donald Trump a wordo acusa tambe di stroba investigacionan, e a nenga di coopera cu congreso. Un persona anonimo a bati alarma y a informa congreso di un yamade entre e president di Ucrania y Trump. Den e yamada e presidente Mericano a informa cu e lo no duna Ucrania e placa tanten cu nan no investiga Joe Biden. Esaki tawata un abuso di poder di su banda.
Den 2020 e caso huridico lo cuminsa, y aki e senado cu tin un mayoria Republicano, lo mester dicta riba kico e consequencianan lo ta. Pues si ta condena Trump pa actonan criminal y ta bahe for di su puesto o si ta lage keda den poder. Hopi experto a conclui caba cu e senado lo no vota contra nan mesun presidente. Pues e chance pa nan bay encontra di nan mesun partido Republicano ta casi inexistente.
