Djárason 11 di dezèmber último, e último kasonan di tráfiko pa e aña aki a tuma lugá. E diferente desishonnan di wes, ta duna un indikashon di e infrakshonnan mas komun den tráfiko na Kòrsou. Hues a dikta sentensia riba korementu di auto sin faha di seguridat, kore outo riba velosidat haltu, kore ku mucha den outo sin ku e tin faha bistí, ponementu di ‘fever’ i kore outo sin dokumentunan (bálido).
Maneho pa residivista
Durante di e kaso entre otro a kondená e sospechoso M.M.J.R. na 6 siman di kastigu kondishonal pa korementu pa di tantisimo bes sin seguro den outo. E sentensia di korte ta basá riba e maneho pa atendé ku residivista, kaminda personanan ku repetidamente ta kore outo sin reibeweis, ta wòrdu yamá pa presentá den korte. Durante di e kaso den korte ta demandá un kastigu mas haltu. Esaki den mayoria kaso ta un kastigu kondishonal di algun siman. E maneho aki ta konta di awor pa dilanti tambe pa korementu di outo ku no ta sigurá. E manera di atende aki, a mustra di ta hopi efektivo i Ministerio Públiko ta spera ku e ta kontribuí na kambio di komportashon iresponsabel den tráfiko.
Transportá mucha sin faha di seguridat
Durante di e kaso den korte, hues a but tambe un mayor ku tabata kore ku su yu chikí den auto sin e faha di seguridat bistí manera lei ta preskribí. Manera ya a anunsiá, polis lo duna un verbal na personanan ku ta kore ku mucha den auto sin ku e mucha tin su faha di seguridat bistí. Esaki ta konta pues pa tur mucha ku ta sintá patras den auto. Hende ta tuma rísiko intolerabel dor di kore ku un mucha den outo sin ku esaki tin su faha bistí. E but ku e shòfur/mayor a haña tabata den e kaso aki 300 florin.
‘Fever’ Banda di esaki, señor R.V.d.V. a paresé dilanti hues pa dos kaso di ponementu di ‘fever’, den kua na un di e okashonnan el a hui pa polis. Pa e promé kaso e akusado a keda apsolbé, pa motibu ku probablemente e tabatin pèrmit pa pone ‘fever’ na e sitio kaminda esaki a tuma lugá. Pa loke ta trata e di dos kaso di ponementu di ‘fever’, e akusado a haña un but di 1500 florin i un prohibishon kondishonal pa kore outo i un periodo di prueba di tres aña. A duna e akusado su outo – ku tabata den beslag for di mei – bèk.
Faha di seguridat i velosidat haltu
Tambe e sospechoso A.M.F. a keda kondená pa komportashon peligroso den tráfiko (un infrakshon). Riba 8 di òktober 2018 el a kita ku su outo for di kaminda na altura di Aqualectra, riba Helmin Magno Wiels Boulevard. E mes a keda gravemente heridá, un di e pasaheronan tambe a keda heridá i otro pasahero a bin fayesé. Niun di e tres personanan tabatin un faha di seguridat bistí. Si nan tabatin un faha di seguridat bistí, esaki lo por a evitá e final tan lamentabel aki, apesar ku e outo tabata move riba velosidat hopi haltu. E hues a duna 100 ora di kastigu di trabou di kua 50 ta kondishonal (ku un tempu di prueba di 2 aña) i un prohibishon kondishonal pa kore outo pa 12 luna i un tempu di prueba di tres aña.