Un noticia cu diahuebs atardi a trece alegria den pueblo ta e anuncio cu Prome Minister Evelyn Wever-Croes a haci durante conferencia di prensa special di Gobierno di Aruba na unda cu e mandatario principal di nos pais a entrega e bon noticia pa nos pueblo cu entrante januari 2020, coriente lo conoce rebaho di tarifa.
Un punto di prioridad cu Gabinete Wever-Croes tawata tin desde inicio di gobernacion tabata di baha gasto unda ta necesario y unda cu ta posibel. Esaki Gobierno di Aruba a demostra tambe na momento cu a cuminsa goberna, reduciendo e cantidad di Ministerionan for di 9 pa 8. Gobierno a pone un maximo di personal pa cada bureau di Minister y a instrui tur instancia y compania Gubernamental pa nan tambe mantene nan mes na e ehercicio aki tambe.
Un di e puntonan cu desde principio tabatin prioridad pa Gabinete Wever-Croes ta duna alivio na nos pueblo unda cu por. P’esey a aumenta salario minimo, a amplia canasta basico, a baha belasting pa penshonadonan, a baha grondbelasting, a aumenta e contribucion di Gobierno pa cu gastonan di entiero. Esakinan ta djis pa menciona algun.
Awe Gabinete Wever Croes orguyosamente por agrega na e lista aki e REDUCCION DI TARIFA DI CORIENTE. Tarifa di coriente ta baha entrante 1e di januari 2020 pa henter nos pueblo inclusivo comercio.
E REBAHO PA UZO DOMESTICO TA:
Esnan cu consumi 0 – 500 KWH lo ricibi un rebaho di 9.9%
Esnan cu consumi 500 kw – 1000 KWH lo ricibi un rebaho di 10.4%
Esnan cu consumi riba 1000 KWH lo ricibi un rebaho di 8.4%
E REBAHO PA COMERCIO:
Chikito: lo conoce un reduccion di 7%
Grandi: manera hotelnan lo ricibi un reduccion di 7%
PA FUNDACIONNAN MISA, SCOLNAN,:
Lo haya un reduccion di 9%
E logro a bira posibel despues cu dos aña largo a hiba un maneho financiero responsabel unda cu a mantene gastonan abou, unda cu no a desperdicia placa ni na fiesta ni derrocha. Tur esaki combina cu e decision di cumpra fuel oil pa na un prijs mas abou pa full 2020 (Swap) ta hacie posibel pa baha prijs di coriente entrante 1e di januari 2020.
Esaki ta e prome di hopi otro bon noticia cu Gabinete Wever Croes tin pa anuncia pa 2020. Gabinete Wever-Croes cumpliendo cu Pueblo di Aruba!
