Diamars anochi a tuma luga e celebracion di conmemoracion di 100 aña di e Aereolinea Colombiano Avianca cu ta e aerolinea di mas biew di Sur America y e di dos mas biew di mundo despues di KLM. Desde December 5 di 1919, e aereolinea a cuminsa opera. Y awe, Avianca ta e compania di aereolina di mas grandi na Colombia y e di dos mas grandi den Latino America cu un lista di destinacionnan extenso.
Prome Minister Evelyn Wever-Croes durante e encuentro ameno aki na e VIP Garden di Aeropuerto Reina Beatrix, a felicita e aerolinea gradiciendo nan pa hunga un rol importante den e industria turistico na Aruba desaroyando e mercado Latino Americano. Awendia cu e situacion dificil na Venezuela, Bogota a bira nos hub pa Latino America. Cu e crecemento di comunidad Colombiano na Aruba y e acuerdo di diferente programa di Salud Publico di AZV na Colombia, a estrecha mas e lasonan entre e dos paisnan.
Prome Minister Evelyn Wever-Croes: “100 aña di existencia y e legado di Avianca, ta testimonio di e fortalesa di e aereolinea. Sin duda nos mester para keto un rato y puntra nos mes tur loke a wordo logra den e ultimo 100 añanan. Esaki ta un momento berdadero pa celebra y como un di e aereolineanan mas biew di mundo, nos ta comparti hunto cu Avianca e logro grandi aki. Aruba, como un participante principal den e industria turistico den nos region, ta aprecia hopi e asociacion solido cu Avianca y su nivel halto di flota.
Na e accionistanan, Star Alliance Group, staff y trahadonan di Avianca rond mundo y specialmente esnan di Aruba, pabien cu e 100 añanan di Avianca. Nos ta orguyoso di ta socio den e celebracion aki y ta expresa nos gratitud na Avianca pa su sosten na Aruba y pa conecta Aruba cu Latino America y mundo. E celebracion excepcional aki ta fortalece mas ainda e lasonan entre Colombia y Aruba no solamente cu e sosten den nos turismo pero tambe den e lasonan economico, social y familiar di ambos comunidad”.
Diferente otro orador a hiba palabra e anochi aki entre otro Ronella Tjin Asjoe-Croes di ATA, Joost Meijs CEO Aruba Airport Authority NV y Pamela Flores, Regional Sales Coordinator Centro America y Caribe pa Avianca. Tawata tin un bunita show di e cultura Colombiano y a corta bolo pa celebra 100 aña. Na final e grupo Vallenato Plus a clausura e evento cu ritmo y musica Colombiano. Tur invitado y prensa presente a gosa di e celebracion di 100 aña Avianca.