Home » Introdukshon di tarifa nobo pa seguridat di frontera na yanüari 2020

Introdukshon di tarifa nobo pa seguridat di frontera na yanüari 2020

by Admin
0 comment 53 views

Willemstad, Korsou: For di 1 di yanüari 2020, pais Kòrsou lo kobra un tarifa di $1.32 na imigrashon, pa optimalisá e seguridat di frontera. E tarifa aki lo keda kobrá dor di Curaçao Airport Partners (CAP) na nòmber di pais Kòrsou i lo ta aplikabel riba tur pasahero ku ta sali for di Kòrsou òf ku ta di tránsito.

E lei di seguridat di frontera a keda introdusí riba 1 di novèmber 2019 i ta referí na e gastunan asosiá ku garantia di oumento di seguridat i implementashon di medidanan di seguridat mas haltu na aeropuerto. Garantia di oumento di seguridat ta rekirí implementashon di medidanan di seguridat mas haltu pa seguridat i fasilidat di pasahero, manera: e sistema di seguridat di frontera global yamá ‘Advanced Passenger Information System’ (APIS), outomatisashon teknológiko adishonal manera eGates i otro rekursonan nesesario pa optimalisá funshonamentu di imigrashon / fasilidat di pasahero.

Na 2015 imigrashon na aeropuerto a kuminsá ku outomatisashon di e proseso di kòntròl na frontera p’asina maksimalisá efisiensia i seguridat na fronteranan. E portanan elektróniko pa kontrolá frontera, konosí komo eGates a keda instalá no muchu despues, asina dunando pasaheronan ku tin 18 aña òf mas i ku tin un pasport europeo, kanades òf merikano e oportunidat pa hasi uso di eGates. E promé eGates tabata un regalo di Curaçao Airport Holding (CAH) na Ministerio di Hustisia. For di e tempu ei CAH a keda traha huntu ku Ministerio di Hustisia pa sigui alsa kalidat i optimalisá e uso di eGates.

Pa kontinuá ku oumento di seguridat di frontera, pais Kòrsou a kumpra APIS. APIS ta un banko di data elektróniko kaminda aerolíneanan por hinka informashon di pasport di pasaheronan pa organisashonnan di Hustisia promé ku ora di vuelo. Solamente departamentonan di Hustisia tin akseso na e banko di data aki; i e informashon ta keda kompartí na un manera sigur i pa metanan di seguridat.
E banko di data aki no solamente ta permití Kòrsou pa tin mihó kòntròl di ken ta drenta e pais,pero tambe ta duna informashon adelantá di esnan ku ta biniendo e pais. Esaki ta permití tambe ku Kuerpo Polisial Kòrsou, huntu ku un ret di otro organisashonnan hudisial rònt mundu por kombatí menasanan di seguridat global.

Banda di APIS, Ministerio di Hustisia na nòmber di e departamento di imigrashon di KPC a traha huntu ku CAH tantu pa kumpra mas eGates, komo pa desaroyá formanan nobo i inovativo pa prosesá pasaheronan dor di kontròl di imigrashon. E meta aki ta kla: halsa seguridat i efisiensia. Esaki pa seguridat di nos pasaheronan i aeropuerto, i tambe sigurá ku e pasahero ku ta permití pa drenta/sali nos pais por biaha/pasa dor di aeropuerto sin ningun problema.

E tarifa di seguridat di frontera ta pa paga gastunan relashoná ku entre otro e desaroyonan aki. Mester remarká ku aktualmente ta den e proseso pa implementá APIS, i ku otro trayektonan di optimalisashon ya ta kanando denter di e organisashon. Debí na esaki lo kuminsá kobra e tarifa for di 1 di yanüari 2020. E tarifa aki ta inkluí un komponente standart ku por lo general a keda implementá serka otro paisnan internashonal. Ya a informá e aerolíneanan tokante e tarifa di $1.32 i den desèmber aki lo kompartí mas informashon tékniko ku aerolíneanan. E tarifa aki ta keda kobrá komo parti di e gastunan di aeropuerto konosí komo ‘passenger facility charge’ (PFC).
Wilhelminaplein z/n | Willemstad, Curaçao | T.: +(599) 9 465-8433 | F.: +(599) 9 465-8083 | www.gobiernu.cw

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio