Home » Segun Melvin Tromp di Partido AVP: Gobierno di MEP y Rocco Tjon stop di sconde tras di AVP

Segun Melvin Tromp di Partido AVP: Gobierno di MEP y Rocco Tjon stop di sconde tras di AVP

by Admin
0 comment 44 views

 

Practicamente tur miembro di gabinete Wever Croes no ta haci un solo declaracion sin menciona nomber di partido AVP y esaki ta conta mesun cos pa parlamentarionan di MEP cu ta sigui mira busca pa haci politica cu nomber di AVP
Melvin Tromp di partido AVP ta mustra cu na luga di dedica nan tempo na cumpli cu promesanan haci na pueblo di haya solucion pa pueblo por bira miho y duna pueblo bek kico nan a ranca di pueblo den e ultimo dos añanan.
“Sin excepcion di ningun, di Prome Minister te na miembronan den Parlamento di MEP, ningun kier para responsabel pa e desaster y inhusticia cu nan ta cometiendo contra pueblo dor di sikiera papia berdad cu pueblo.
Siman pasa Prome Minister Evelyn Wever Croes ta bin bek for di Hulanda y na luga di splica pueblo kico el a priminti gobierno di Hulanda di lo haci pa saca mas placa for di pueblo, e ta pretende di bisa cosnan cu ningun mandatario Hulandes a sikiera menciona.
Segun Evelyn, gobierno Hulandes ta na altura cu AVP semper a entrega presupuestonan irrealistico y cu awo si su gobierno lo presenta presupuestonan realistico y cu cifranan corecto.
Sinembargo su bishita na Hulanda ta pa evita di haya un ‘aanwijzing’ di Conseho di Minister di Reino, pa su mal maneho riba e situacion financiero di su gobierno, caminda keto bay Hulanda no ta mira cu su gobierno ta cumpli cu palabracionnan cu su persona y Minister di Finansa a priminti di haci cu e protocol di 2018.
No tin ningun declaracion di Prome Minister caminda e no ta menciona gobierno di AVP y den cierto sentido por compronde esaki ya cu su gobierno mes no tin solucion pa nada, no ta logrando pa cumpli cu normanan existente y acuerdonan cu nan mes a poni riba papel.
E tipo di reaccion aki a bira algo normal pa Prome Minister y su gobierno pero cumpli cu pueblo loke nan a priminti di haci, ningun momento e ta papia di esaki.
E locura aki a plama tambe pa algun miembro di fraccion di MEP den Parlamento y Luigi bergen ta ehempel di esaki siman pasa, caminda na inicio di siman, el a anuncia su retiro temporal como Parlamentario te ora cu su caso pa violencia domestico keda aclaria.
Ora cu pueblo a kere cu Luigi Bergen ta realisa e seriedad di su decision, e ta haya ta bon pa busca un tipo di hustificacion dor di pretende cu e mesun dialuna mainta aki, algun miembro di AVP lo a acerca su persona pa bira independiente pa asina gabinete Wever Croes tin cu bay cas.
E falta di seriedad aki, e falta di hombresa aki ta resaltante y lo tabata na su luga pa Luigi no bisa cu ‘hendenan’ di AVP a acerca su persona pero menciona nomber di fam di esunnan di AVP cu lo a tuma contacto cu su persona ya cu pueblo ya no ta kere den e smoesjes di nan parti.
Loke Bergen ta neglishando totalmente ta e hecho cu su persona mes a drenta Parlamento despues di retiro di un colega di dje y cu ora el a anuncia su retiro, el a bira di tres miembro di fraccion di MEP cu a saca na conclusion y tur esey si metemento di AVP.

Ora cu a kere cu nan lo siña nan les y cuminsa carga responsabilidad pa nan actonan, ta surgi e lider di fraccion di MEP, Rocco Tjon kende a wordo confronta pa algun hecho palpabel di su caso caminda e tin prohibicion di acerca su yiu muhe.
Den su reaccion diahuebs atardi Rocco Tjon a dicidi di papia riba hechonan contra di su persona cu miembro di fraccion di AVP, Benny Sevinger a trece dilanti y su reaccion ningun caminda tabata un splicacion na pueblo di loke realmente ta e caso di su ex esposa y yiu muhe.
Rocco no a papia di e prohibicion cu el a haya di Corte cu e no tin mag di tin contacto cu su yiu muhe, di dos rapport di specialistanan aki na Aruba a haci den su contra y di loke a sosode cu su yiu muhe.
No Rocco Tjon a papia di Benny Sevinger el a papia di Mike Eman, el a papia mas tanto di AVP pero nada riba loke Benny a papia di su caso sin ningun momento defende su mes dilanti di pueblo.
Su unico argumento ta cu su abogado lo bay studia tur loke Benny Sevinger a trece dilanti pa asina e cuminsa un caso contra di e miembro di fraccion di AVP
Rocco para responsabel pa bo actonan, papia e berdad di bo caso, bisa tur loke a pasa y splica con bo no a duna tur informacion necesario na e Conseho di Minister di gabinete Mike Eman, pa asina bo a haya e nombracion como director di KIA.
No sconde tras di AVP, ningun di boso sconde tras di nos partido, carga boso responsabilidad y cumpli cu loke boso a priminti pueblo, estas prosperidad y no e abusonan cu ta tumando luga dos aña caba contra pueblo,” sr Melvin Tromp di AVP a trece dilanti.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio