Kuerpo Polisial Korsou ta informa: Kaso di tiroteo ku morto.

Willemstad, Korsou: Djasabra 30 di novèmber 2019, alrededor di 05.07’or Sentral di Polis a risibí notifikashon di un kaso di tiramentu ku a tuma lugá den Zwaan i ku tin un persona heridá. E promé unidat ku a yega na e sitio a topa ku un hòmber drumí abou ku herida di bala. For di un investigashon ku polis a hasi na e sitio, ruman hòmber di e víktima a deklará ku un ratu promé e ku su ruman tabata pafó di kas i e la drenta paden i laga su ruman pafó. Diripiente e la tende zonido di bala for di un arma di kandela. Na momentu ku e la bai pafó e la topa e víktima drumí abou ku herida di bala. Alrededor di 05.50’or dokter di polis a konstatá morto di e hòmber Carlos Manuel Ferero Abreu nasé na Repúblika Dominicana dia 8 di yanüari 1993. Na e sitio polis a haña i konfiská diferente huls. Riba òrdu di Ministerio Públiko a konfiská e kurpa sin bida pa mas investigashon.