Gaita di Mama Rosa y Grupo di Betico na Centro di Bario Tanki Leendert
ORANJESTAD – Diadomingo awor lo tuma luga e rifa di auto di Aruba One Happy Island Lions Club. Nos ta invita Aruba pa yuda nos yuda esnan den comunidad cu ta den necesidad.
Aruba One Happy Island Lions Club ta e club di servicio mas jong localmente y durante su 2 añanan di existencia a bin ta haci y/o participa den varios proyectonan manera e.o. “Beach clean-up”, Proyecto di Planta Mata, Simulacro organisa pa Bureau Rampenbestrijding Aruba, Paranda di Bochincha pa nos personanan special, Verf scol Santa Teresita cu Aruba Doet, Blood Donor Drive, Caminata den Naturalesa, Serenata pa Nos Clasiconan. E aña relaciona cu Dia Mundial di Diabetes a organisa 3 evento exitoso cual tabata e presentacion “Diabetes y Nutricion” na scol basico, reparticion di appel cu mensahe educativo na automobilistanan y por ultimo e charla interactivo pa comunidad.
Banda di esaki a organisa y promove diferente campaña y charla di concientizacion den nos comunidad manera pa ‘Tene Aruba Limpi’, ‘Trafico Conciente’, ‘Conservacion di Mangelnan’, ‘Dia di Paz’, Servicio Boluntario y Comunitario, Lecturanan riba Concientizacion pa un trafico sigur pa Cuerpo Policial, Fundacion Zinnia y FADA. Pa e aña nobo lo tin mas proyecto riba programa cu material eductivo pa muchanan di scol riba e tema di Diabetes, Bista, Medio Ambiente y tambe formacion di un club di Lidernan Hoben den nos Comunidad. Proyectonan pa esnan den necesidad y esnan special, atencion pa nos grandinan ta keda un prioridad.
Pa recauda fondo y cumpli cu nan proyectonan di servicio na bienestar di comunidad diadomingo lo tin sorteo di Auto na Centro di Bario Tanki Leendert pa despues 7 ‘or di anochi. Lo tin un actividad cu presentacion di Grupo di Gaita E Muchanan di Mama Rosa y Grupo di Betico pa asina trece animacion cu musica di fin di aña como tambe lo tin un bar y cushina bon surti. Ademas pa nos muchanan lo bay tin sorpresa dino jump. Un invitacion na ur esnan cu ainda no a haya e oportunidad pa cumpra e rifa, bo tin e oportunidad ainda. Un danki ta bay na tur esnan cu ya a contribui caba, corda warda bo ticket bon.
Diasabra 30 di november nos lo tey desde atardi y diadomingo 1 di december nos miembro- y boluntarionan lo ta na Centro di Bario Tanki Leendert bendiendo e rifa di solamente 5 florin pa ticket caminda bo por gana como prome premio un Auto Hyundai Eon 2019 nobo, segundo premio un Estadia di un fin di Siman na un hotel local y tercer lugar un ticket pa 4 persona por disfruta un dia riba De Palm Island. Tur fondo recauda lo wordo inverti den proyectonan na bienestar di comunidad. Pa mas informacion y buki di rifa por tuma contacto na number 746-0428 of 594-0043. Un biaha mas danki pa e cooperacion y comprension y suerte na un y tur, nos ta sperabo cu bo famia dia 1 di december na Centro di Bario Tanki Lendert.