Oranjestad – Awe 29 di november ta un fecha caminda nos ta recorda e di dos aniversario di e tragedia cu a sosode riba nos isla caminda dos mucha inocente a perde nan bida. E dos muchanan a fayece aconsequencia di maltrato severo y negligencia. Esaki ta algo cu nos comunidad di Aruba no por lubida y ta un sucedido cu hamas por ripiti.
Sociaal Crisisplan a wordo estableci basa ariba e crisis social cu ta eherce aki na Aruba y e dos criaturanan aki cu a perde nan bida. Esaki ta e motor di hopi persona y instancia cu ta trahando incansabel pa logra e meta pa alivia e crisis social aki na Aruba. Pa es motibo nos como ciudadano no ta permiti pa lubida kico ta e Derechonan di nos Muchanan, basa ariba e Tratado di nos Muchanan.
Kico ta e Derechonan di Mucha? Abo ta na altura di e derechonan di cada mucha? Akibou por lesa 10 articulo di e 54 articulo di derechonan di mucha cu ta wordo trata internacionalmente;
1. Un mucha ta un persona bou di 18 aña; 2. Tur derecho ta aplicabel pa tur mucha; 3. E interes di mucha mester ta central; 4. E estado/pais mester boga pa e realisacion di tur e derechonan; 5. Mayornan ta guia e yui ora di eherce su derechonan; 6. Cada mucha tin derecho riba bida y desaroyo; 7. Cada mucha tin derecho riba un nomber y nacionalidad; 8. E estado/pais mester proteha e identidad di e mucha; 9. Cada mucha tin e derecho pa lanta y crece cerca su mayornan; 10. Mucha y mayor tin e derecho di ta hunto como famia.
Tur mucha tin nan derecho y ta keda na nos como adultonan responsabel pa dunanan e guia y e sosten, e cariño y proteccion, e motivacion y comprension pa asina nan por crece den un ambiente caminda nan bienestar y siguridad ta central. Nos no mester lubida cu nos muchanan
di awe ta nos futuro di mañan y hunto como un comunidad nos por pone como meta pa proteha tur nos muchanan di tur forma di abuso y negligencia pa asina nan por crece y bira adultonan saludabel y emocionalmente stabil.
Ultimo desaroyonan ta indica cu implementacion di e 31 proyectonan bou capa di Sociaal Crisisplan (SCP) gradualmente ta dunando su frutonan importante manera ampliacion di capacidad y expansion di servicionan social di diferente fundacionnan y departamentonan di gobierno. Asina mes, comunidad ainda ta ser confronta cu incidentenan lamentabel cu ta duna señal cu mester sigui traha diligentemente pa yega na cambionan cu ta necesario. Un di proyectonan importante ta esun unda tur e sectornan ta trahando hunto pa yega na un protocol pa implementacion di e ley di codigo di siguridad pa menornan. E codigo di siguridad aki lo haci raportahe di incidentenan y sospecho di abuso di menor obligatario pa tur profesionalnan. Tambe lo implementa un sistema di registro central cu tur departamento concerni lo atende cu casonan di abuso y negligencia na un forma hopi mas lihe y eficiente.
Abuso di mucha ta algo cu nos no por tolera ni acepta y a bira tempo pa nos no bira wak otro banda, sino enfrenta esaki. Si abo conoce of sa di un caso di abuso di mucha no keda keto, pero kibra e silencio. Yama pa conseho of ayudo si bo ta sospecha abuso of negligencia di menor na 5881010 pa haya mas informacion na Bureau Sostenemi cu ta e meldpunt oficial. Paso tur mucha tin e derecho di proteccion y amor. E bienestar y siguridad di nos muchanan ta e responsabilidad di nos tur.
Pa mas informacion tocante Sociaal Crisis Plan por tuma contacto na 5281100 of por bishita nos Facebook page @scparuba.