Home » Minister Otmar Oduber a reuni cu KVK, ATIA y AHATA riba e ley di prohibicion di plastic di un solo uzo, styrofoam y Oxybenzone

Minister Otmar Oduber a reuni cu KVK, ATIA y AHATA riba e ley di prohibicion di plastic di un solo uzo, styrofoam y Oxybenzone

by Admin
0 comment 48 views

Diaranson Minister di Desaroyo Teritorial, Infrastructura y Medio Ambiente sr. Otmar Oduber conhuntamente cu Chief of Staff di Ministerio sra. Indra Zaandam a tene un reunion cu e organisacionnan Aruba Hotel and Tourism Association (AHATA), Aruba Trade and Industry Association (ATIA) y Kamer van Koophandel (KvK). E Topico cu a trata durante di e encuentro ta e ley di prohibicacion di Plastic di un solo uzo, styrofoam y Oxybenzone cu a pasa recientemente (19-11-2019). mester bisa cu tabata un reunion cu a bay sumamente ameno.

Cada organisacion a haci uzo di e momento pa intercambia di pensamentonan riba e ley, a trata puntonan importante durante e fase transitorio cu lo tuma luga te cu 1 july 2020 y e aspecto di ‘conscientisacion riba e tema di proteccion di medio ambiente’ cu ta un punto cardinal den henter e proceso pa por a yega na e punto cu a pasa e ley (y pa den futuro).
E organisacionnan tabatin reaccion sumamente positivo riba e gran paso aki cu Gobierno a tuma a traves di trabou duro cu a tuma luga di parti Ministerio encarga cu medio ambiente, cual mester bisa cu ta un paso cu a pone Aruba den luz positivo internacionalmente. A ricibi atencion y pregunta di mas islanan den region manera di Sint Martin y di organisacionnan grandi mundialmente manera Wereld Natuur Fonds (WWF)!

Importancia National
E ley aki ta na beneficio di nos medio ambiente y salud di e ser humano, cual ta aspectonan cu ta cuadra cu e vision di Gabinete Wever – Croes pa adheri na e Sustainable Development Goals (SDGs), specialmente numbernan 12, 13, 14 y 15. Minister Otmar Oduber a splica cu e ley tin un impacto hopi grandi pa nos medio ambiente y a papia durante di e ultimo dos añanan riba e importancia di proteccion di nos flora y fauna (por a mira esaki bek a traves di e diferente manehonan introduci).

Conforme un Landsbesluit cu lo mester finalisa prome cu 2020, lo prohibi e productonan di mas basico cu ta perhudica den cantidad grandi, nos medio ambiente. Manera cups, forki di plastic, tayonan, styrofoam box, straw di plastic (pa menciona algun). Oxybenzone cual tambe ta keda prohibi, ta un ingrediente presente den sunblock cu investigacionnan a comproba cu e tin gran efecto negativo riba nos bida marino, specialmente nos coralnan.

Pa conclui, importante pa indica ta cu e lista cu prohibicion lo ta un lista dinamico cual por keda adapta y elabora riba dje den consulta cu diferente actor importante. E ley a pasa 19 di november 2019 y lo efectua esaki entrante prome di juli 2020. Caminda cu ni importacion ni benta di e producto lo ta permiti mas na Aruba. Dunando tur persona e tempo necesario pa haci nan adaptacion y forma di opera pa por cumpli cu ley. E lista di productonan cu primordialmente lo wordo prohibi lo keda publica den medionan di comunicacion.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio