Diasabra anochi den un Renaissance Convention Center completamente jen Fundacion Movemento ta Bida a tene su songfestival 60+na Papiamento hunto cu e Nochi di Baliadornan.
Tur cantante cu a partisipa a duna un show perfecto di nan talento acompanja pa Papito y su Biba Lekker Band Plus. Henter e songfestival tabata bon hinka den otro door di e maestro Roy Sneek cu durante 5 luna a prepara tur e cantantenan.
E anja aki FMTB a hanja ayudo di UNOCA den e festival aki y ja caba tur hende kier pa esaki bin bek otro anja cu canticanan di Pasco na Papiamento. Nos no mag di lubida nos dushi idioma y tur hende a keda contento cu tur locual a worde presenta. Rene Ridderstaat como maestro di ceremonia a sa di guia henter e anochi aki perfectamente y FMTB ta gradisi radio 88.9 cu Mimi, Jaime y Helen cu a transmiti e festival .
Despues di e festival Nos cu Nos, Reflection Band y The Musical Time a sigi toka y a deleita e publico cu a keda jena e pista te final di e anochi.
FMTB kier a gradisi tur esnan cu a bin e anochi aki y tambe Guardian Group cu a sponser tur Plakaat pa e ganadornan y Manrique Capriles cu a regala cada partisipante un bunita recuerdo. Tambe FMTB kier a gradici e juradonan cu tabata consisti di artistanan 60+: Ito Dania, Maybeline Arends, Sharon Rose, Roberto Geerman,John Hessen. President tabata Leo Rodriquez y IT person tabata Mario Middendorp.
E resultado ta lo siqiente:
E Cantante mas popular: Victoria Andrews
Best show: Wim Steenhuis
5 Lugar: Roberto Orman
4 Lugar: Juan Carlos Hill
3 Lugar: Rubia Maduro
2 Lugar: Rudolf Lesire
1 Lugar: Freddy Maduro
Un pabien ta bai pa tur e ganadornan /partisipantenan y esnan cu no a hanja chance pa partisipa e anochi aki cuminsa prepara pa otro anja.