Ariba 20 di november 1999 tawata e prome biaha cu un mucha a yama e number 131. For di e tempo ey Fundacion Telefon pa Hubentud Aruba ta opera segun e Convenio di Derecho di mucha. Articulo 12 y 13 di e Convenio di Derecho di Mucha ta mustra ariba e importancia pa un mucha tin un opinion y pa e por expresa esaki.
Haciendo esaki e punto cardinal den e ayudo brinda na nos mucha y hobenan, te cu 20 di november 2019 Telefon pa Hubentud Aruba a duna mas di 45.000 mucha y hoben e oportunidad pa expresa nan mes.
Pa celebra 20 aña di existencia Fundacion Telefon pa Hubentud Aruba a organisa Pro / Contra. Pro / Contra ta un debat caminda hobennan di 13 te/cu 17 aña a debati ariba diferente tema cu ta trata nan y Aruba. E temanan cu nan a debati ariba tawata: Naturalesa, Enseñansa, Adiccion, Cuido di nos grandinan, Actividad den tempo liber y Desaroyo social. E hobennan a representa John Wesley College, Colegio San Antonio, Parlamento Hubenil y Impact Café.
Durante e debate un hoben defensor di e ponencia tocante reduccion di desaroyo social door di uso di internet, media social y gaming ta comenta. ‘Ta berdad. Un humano mester papia cu hende. Riba gaming y Internet bo no ta papia cu un humano. Si bin problema cu ken bo ta bay papia. Antes famianan ta sinta na mesa y papia bay gol. Awendia tur ta un otro caminda riba telefon, laptop etc. Manera ora un famia sali, hasta den auto un ta core y e otronan ta riba nan telefon. No por sigui asina’.
No solamente e hobennan por a expresa nan mes durante Pro / Contra, tambe nan a ser scucha door di personanan cu ta desaroya norma y direccion den cual Aruba lo bai. E hobennan a expresa nan mes na representantenan di Ministerio Publico, Parlamento di Aruba, Ministerio di Asuntonan Social, ‘Directie Onderwijs’, ‘Directie Natuur & Millieu’, ‘Directie Sociale Zaken’ y ‘Directie Volksgezondheid’. Banda di scuchanan e representantenan aki a fungi como hurando durante Pro / Contra. Na final di e debate Impact Café a resulta ganador di Pro / Contra.
Mas bunita tawata cu e debate a ser dirigi pa e hobenan di e ‘Jongerenraad’ di Fundacion Telefon pa Hubentud Aruba.
Tur e puntonan cu e hobennan a expresa durante Pro / Contra lo ser poni den un documento cu lo ser presenta na tur e institutonan cu ta dicidi norma y direccion pa pais Aruba.
Fundacion Telefon pa Hubentud kier a gradici tur cu a haci Pro / Contra un realidad. Un gradicimento special ta bai na tur hurado, Dr. Edward Cheung Center for Innovation, Setar nv, Burger King, Kooyman y CIBC Firts Caribbean Internacional Bank.
